“ASAN xidmət” mərkəzlərində fəaliyyət göstərən dövlət qulluqçuları üçün təlim təşkil olunub

İyunun 9-da Azərbaycan Respublikasının Prezidenti yanında Dövlət İdarəçilik Akademiyasında (DİA) “Şəhərsalma və Memarlıq İli” çərçivəsində təlim keçirilib.

DİA-dan AZƏRTAC-a bildirilib ki, təlim “ASAN xidmət” mərkəzlərində fəaliyyət göstərən dövlət qulluqçuları üçün təşkil olunub. DIA -nın rektoru akademik Urxan Ələkbərovun təqdim etdiyi “Şəhərsalma və memarlıqda innovativ davamlı inklüziv inkişaf siyasəti: Azərbaycan Respublikasının təcrübəsi” mövzusunda keçirilən təlim zamanı müasir şəhərsalma siyasəti, memarlıqda innovativ yanaşmalar və bu sahədə tətbiq olunan qabaqcıl idarəetmə mexanizmləri təqdim edilib.

Təlimdə şəhərsalma və memarlıq sahəsində beynəlxalq yanaşmalar və milli təcrübə kompleks şəkildə təhlil olunub. BMT-nin Məskunlaşma Proqramı (UN-Habitat) çərçivəsində keçirilən qlobal forumların xronologiyası, inklüziv və davamlı yaşayış mühitinin formalaşdırılması istiqamətində qəbul olunmuş yanaşmalar, eləcə də Azərbaycanın bu sahədə beynəlxalq əməkdaşlıq təcrübəsi iştirakçıların diqqətinə çatdırılıb.

Akademik Urxan Ələkbərov çıxışında dövlət idarəçiliyində inkişaf məqsədlərinin təkamülünü izah edərək, ümumi daxili məhsul, insan inkişaf indeksi, davamlı inkişaf indeksi və inklüziv inkişaf göstəricilərini müqayisəli şəkildə təqdim edib. Bu indikatorların şəhərsalma siyasətində prioritetlərin müəyyənləşdirilməsində mühüm rol oynadığı qeyd olunub.

Təlim zamanı resursların səmərəli idarə olunması və enerji istehlakı mədəniyyəti məsələlərinə də toxunulub, fərdi davranışın rolu, texnoloji tənzimləmə mexanizmləri, eləcə də təhsil və maarifləndirmənin əhəmiyyəti vurğulanıb. Bildirilib ki, davamlı şəhər mühitinin formalaşdırılması yalnız infrastruktur layihələri ilə deyil, həm də effektiv idarəetmə yanaşmaları və cəmiyyətin davranış modelləri ilə bilavasitə bağlıdır.

Akademik Urxan Ələkbərov qeyd edib ki, müasir şəhərsalma siyasəti infrastruktur inkişafı ilə məhdudlaşmır, sosial inklüzivlik, ekoloji tarazlıq və texnoloji innovasiyaların inteqrasiyasını özündə birləşdirən kompleks yanaşma tələb edir. O, Azərbaycanın bu istiqamətdə həyata keçirdiyi islahatların ölkəni regionda qabaqcıl mövqeyə çıxardığını diqqətə çatdırıb.

Təlim çərçivəsində təqdim olunan materiallar iştirakçılara şəhərsalma və memarlıq sahəsində müasir yanaşmaların praktiki tətbiqi ilə bağlı biliklərini genişləndirmək imkanı yaradıb.

Tədbir interaktiv və diskussiya formatında davam edib, iştirakçıları maraqlandıran suallar cavablandırılıb.