Aşıq Hüseyn Şəmkirli - Reyhan ilə deyişmə

Aşıq Hüseyn Şəmkirli - Reyhan ilə deyişmə

Reyhan
İki aşıq bir meydanda tapılsa,
Əyləşib sazlarm düzəldər bir-bir.
Sual verib, cavabını alanda,
Duruban meydanı gözəllər bir-bir.

Hüseyn
Aşıqlıq elmindən mən xəbərdaram, 
Aşmışam hər yerdə meydanı bir-bir, 
Yüz on dörd kitabdan almışam dərsim, 
Gəl sənə göstərim ayəni bir-bir.

Reyhan
Müxənnəs gözlərə mənəm bir pıçaq, 
Çoxların salmışam meydandan qaçaq, 
Hanı mənim kimi bir gəndi qoçaq, 
Gələnlər yolların azallar bir-bir,

Hüseyn
Sona kimi sığal verib telinə,
Nə cumubsan sən bu eşqin gölünə, 
Düşməyibsən kamil ustad əlinə,
Sənə dar elərəm dünyanı bir-bir.

Reyhan
Mən Reyhanam, tapmamışam tayımı, 
Mərdlər itirməsin haqqı-sayımı, 
Götürmüşəm ərənlərdən payımı, 
Dediyim sözləri yazallar bir-bir.

Hüseyn
Yetmək olmaz Aşıq Söyün işinə, 
Belə sözlər çətin girər guşuna,
Alım qucağıma, basım döşümə, 
Dərim ağ sinəndən püstanı bir-bir.