Azərbaycan alimləri Barselonada

Dünyanın bir çox tanınmış həkimlərinin qatıldığı beynəlxalq tədbirdə Azərbaycan oftalmoloqları da iştirak edir.

AZƏRTAC xəbər verir ki, Barselonada məşhur "Alcon" şirkəti tərəfindən dünyanın bir çox ölkələrindən olan göz cərrahlarının qatıldığı tədbir keçirilir. Tədbirdə oftalmologiya sahəsindəki ən son texnoloji yeniliklərdən bəhs edilib, göz daxili linzaların yeni icadı nümayiş olunub.

Azərbaycandan gələn nümayəndə heyətinin çıxışları, keçirdikləri cərrahi əməliyyatlar barədə fikir mübadiləsi böyük maraqla qarşılanıb. Qeyd edək ki, Barselonada təşkil olunan bu mötəbər tədbirdə Azərbaycan oftalmologiyasını bu sahənin mahir həkim-cərrahları - Müşfiq Kərimov, Fərəh Abduləliyeva, Aytən Sultanova və Leyla Qəhrəmanova təmsil edir. Nümayəndə heyətinin rəhbəri Aytən Sultanovanın sözlərinə görə, bu cür beynəlxalq tədbirlər onlar üçün böyük imkanlara yol açır.

"Öyrəndiklərimizi, gördüklərimizi öz ölkəmizdə tətbiq etmək, göz xəstəliklərindən əziyyət çəkən insanlara ən son texnoloji vasitələrlə yardım göstərmək bir oftalmoloq kimi ən ali missiyamızdır",- deyən Aytən Sultanova tədbirin gedişindən məmnunluğunu bildirib. Tədbir 3 gün davam edəcək.