Azərbaycan türk dövlətləri arasında birgə layihələrin əsas təşəbbüskarıdır ŞƏRH

Bildiyimiz kimi, Azərbaycan BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) uğurla sədrlik etdi. Bu beynəlxalq tədbir, qlobal iqlim siyasətinin formalaşmasında, yaşıl enerji keçidi və davamlı inkişaf sahələrində ölkəmizin liderliyini bir daha vurğuladı. Dünyanın 200-ə yaxın ölkəsindən 76 mindən çox iştirakçının qeydiyyatdan keçməsi Azərbaycanın yüksək təşkilatçılığının, qlobal miqyasda oynadığı mühüm rolunun göstəricisidir. Prezident İlham Əliyevin rəhbərliyi ilə Azərbaycan, həm regional, həm də beynəlxalq səviyyədə mühüm addımlar atıb, iqlim dəyişikliyi ilə mübarizə sahəsində qlobal təşəbbüsləri dəstəkləyib. Azərbaycanın COP29-a sədrliyi ölkəmizin iqlim dəyişikliyi və yaşıl enerji sahəsindəki fəal rolunu nümayiş etdirməklə qalmadı, həm də qlobal miqyasda bir çox mühüm nəticələrin əldə olunmasına şərait yaratdı. Azərbaycan sədr olaraq iqlim dəyişikliyi ilə mübarizədə yeni təşəbbüslər irəli sürdü və dünya ölkələrini birgə fəaliyyət göstərməyə çağırdı.

COP29 çərçivəsində Azərbaycan, Qazaxıstan və Özbəkistanın dövlət başçılarının imzaladığı Strateji Tərəfdaşlıq Haqqında Saziş Türkdilli ölkələr arasında mühüm bir addım oldu. Qlobal iqlim dəyişikliyi və təbii sərvətlərin dayanıqlı şəkildə idarə olunması bu günün və gələcəyin ən böyük çağırışlarındandır. Bu baxımdan belə bir strateji razılaşma bu çağırışlara cavab vermək üçün qarşılıqlı dəstək və təcrübə mübadiləsi imkanı yaradır. Bu Saziş, Azərbaycan, Qazaxıstan və Özbəkistan arasında yaşıl enerji keçidi, bərpaolunan enerji sahəsində əməkdaşlıq və iqlim dəyişikliyi ilə mübarizə sahəsində birgə addımların atılmasına zəmin yaratmış oldu. Yaşıl enerji keçidi təkcə enerji təhlükəsizliyini gücləndirməklə qalmır, həm də gələcək nəsillər üçün dayanıqlı və təmiz bir ətraf mühitin yaradılmasına imkan verir. Bu Sazişlə hər üç ölkə gələcəkdə yaşıl enerjiyə keçid üçün daha sıx əməkdaşlığa və yeni texnologiyaların inkişafını təşviq etməyə razılaşmış oldu. Bu isə öz növbəsində bütövlükdə Türk dünyası və bəşəriyyət üçün mühüm amil hesab edilməlidir.

Azərbaycan özünün mənsub olduğu Türk dünyasını yalnız tarixən deyil, həm də müasir dövrdə də bir ailə kimi görür. Azərbaycan Türk dünyası ilə əlaqələrə böyük önəm verir və bu əlaqələri davamlı inkişaf etdirmək istiqamətində strateji addımlar atır. Türk dövlətləri arasında siyasi, iqtisadi və mədəni əlaqələrin möhkəmləndirilməsi, həmçinin yaşıl enerji və dayanıqlı inkişaf sahəsində birgə fəaliyyətin gücləndirilməsi Azərbaycan üçün strateji əhəmiyyət kəsb edir. Azərbaycan Türk dövlətlərinin iqtisadi və ekoloji inkişafını dəstəkləməklə yanaşı, bu ölkələr arasında birgə layihələrin və təşəbbüslərin həyata keçirilməsinə öncülük edir. Beləliklə, Türk dünyası, yalnız regional əməkdaşlıqla məhdudlaşmır, qlobal səviyyədə də öz mövqeyini gücləndirir.

Türk Dövlətləri Təşkilatının inkişaf strategiyasının gücləndirilməsində Azərbaycan Prezidenti İlham Əliyevin irəli sürdüyü təkliflər mühüm rol oynayır. Azərbaycanın təşkilat çərçivəsində əməkdaşlıq sahələrinin daha da genişləndirilməsi, həm iqtisadi, həm də ekoloji baxımdan böyük əhəmiyyət kəsb edir. Azərbaycan Türk Dövlətləri Təşkilatında yaşıl enerji, iqlim dəyişikliyi və ekoloji təmiz texnologiyalar sahəsində ortaq təşəbbüslər irəli sürərək, bu təşkilatın dünya miqyasında daha da güclənməsini hədəfləyir. Prezident İlham Əliyevin təşəbbüsləri, yalnız Türk dünyasında deyil, həm də qlobal miqyasda yaşıl enerji və dayanıqlı inkişaf sahəsində əməkdaşlığın genişlənməsinə təkan verib.

Azərbaycanın Türk Dövlətləri Təşkilatının güclənməsində və yaşıl enerji keçidindəki təşəbbüsləri bu ölkələrin birgə fəaliyyət göstərərək qlobal miqyasda həm enerji sahəsində, həm də sosial-siyasi inkişafda uğurlar əldə etməsinə zəmin yaradacaq. COP29 çərçivəsində imzalanan Saziş isə həm Türk dünyasının güclənməsində, həm də müasir dövrdəki qlobal çağırışlara qarşı birgə mübarizə aparmaqda mühüm rol oynayacaq. Azərbaycanın təşəbbüsü ilə reallaşan bu kimi addımlar gələcək nəsillərə yaşıl enerji, dayanıqlı inkişaf və qlobal əməkdaşlıqda kömək edəcək. Gələcəkdə bu əməkdaşlıqların əhatə dairəsinin daha da genişlənməsi və Türk dünyasının birgə fəaliyyətinin güclənməsi həm iqtisadi, həm də ekoloji baxımdan böyük əhəmiyyət kəsb edəcək.