Azərbaycan və Somalinin diplomatik pasport sahibləri qarşılıqlı şəkildə vizadan azad edilirlər

Azərbaycan və Somalinin diplomatik pasport sahibləri qarşılıqlı şəkildə vizadan azad edilirlər.

Ens.Az xəbər verir ki, sözügedən məsələ parlamentin bugünkü plenar iclasının gündəliyinə daxil olub.

İclasda "Azərbaycan Respublikası Hökuməti ilə Somali Federativ Respublikası Hökuməti arasında diplomatik pasport sahiblərinin vizadan qarşılıqlı azad edilməsi haqqında Saziş"in təsdiq edilməsi barədə qanun layihəsi müzakirə çıxarılıb.

Layihəyə əsasən, 2025-ci il 15 oktyabr tarixində Kampala şəhərində imzalanmış Azərbaycan Respublikası Hökuməti ilə Somali Federativ Respublikası Hökuməti arasında diplomatik pasport sahiblərinin vizadan qarşılıqlı azad edilməsi haqqında Saziş iki dövlət arasında diplomatik münasibətlərin inkişaf etdirilməsi və rəsmi səfərlərin sadələşdirilməsi məqsədi daşıyır.

Sazişə əsasən, tərəflərin etibarlı diplomatik pasportlara malik vətəndaşları digər tərəfin ərazisinə daxil olmaq, oradan çıxmaq və tranzit keçmək üçün vizadan azad edilir və hər 180 gün ərzində 90 gündən artıq olmayan müddətdə həmin ərazidə qala bilərlər. Qalmanın 90 gündən artıq olması hallarında qəbul edən dövlətin milli qanunvericiliyinə uyğun olaraq viza və müvafiq icazənin alınması tələb olunur.

Saziş diplomatik nümayəndəliklərdə, konsulluqlarda və beynəlxalq təşkilatlarda fəaliyyət göstərən diplomatik pasport sahiblərinin və onların ailə üzvlərinin hüquqi statusunu tənzimləyir, habelə diplomatik pasportların itirilməsi və ya dəyişdirilməsi hallarında qarşılıqlı məlumatlandırma və yeni səyahət sənədlərinin verilməsi mexanizmini müəyyən edir.

Bununla yanaşı, saziş milli təhlükəsizlik, ictimai asayiş və ictimai sağlamlığın qorunması məqsədilə tərəflərin öz qanunvericiliklərinə uyğun olaraq ölkəyə giriş, qalma müddəti və arzuolunmaz şəxslərlə bağlı tədbirlər görmək hüququnu saxlayır.

Saziş tərəflərin müvafiq dövlətdaxili prosedurlarının tamamlanmasını təsdiq edən son yazılı bildirişin diplomatik kanallar vasitəsilə alındığı tarixdən doxsanıncı gündə qüvvəyə minir, beş il müddətinə bağlanır və avtomatik olaraq növbəti beş illik dövrlər üçün uzadılır.

Saziş Azərbaycan, Somali və ingilis dillərində iki nüsxədə tərtib edilib, bütün mətnlər bərabər autentikdir. Təfsir zamanı fikir ayrılığı yarandıqda ingilis dilindəki mətn əsas götürülür.

Yekunda layihə səsə qoyularaq bir oxunuşda qəbul edilib.