Bakıda 177 eskalator və 2 travolator dəyişdiriləcək

Bakıda yeraltı və yerüstü piyada keçidlərində 177 eskalator və 2 travolator yenisi ilə əvəz ediləcək.

Bu barədə Bakı Şəhər İcra Hakimiyyəti məlumat yayıb.

Bildirilib ki, Prezident İlham Əliyevin tapşırığına əsasən, payız aylarında paytaxtda istismar müddətini başa vurmuş eskalatorların və liftlərin bir hissəsinin dəyişdirilməsinə başlanılacaq.

Bu məqsədlə artıq Finlandiyanın KONE şirkətinin istehsalı olan yeni eskalatorlar sifariş edilib. Qeyd olunur ki, avadanlıqlar keçidlərin fərdi ölçüləri və texniki xüsusiyyətləri nəzərə alınmaqla hazırlanır.

Yeni eskalatorların Bakıya oktyabr-noyabr aylarında gətirilməsi gözlənilir. Bundan sonra onların mərhələli şəkildə quraşdırılmasına başlanılacaq.

Modernləşdirmə işlərinin sakinlərin müraciətləri əsasında həyata keçirildiyi bildirilir. Ümumilikdə işlər 46 yeraltı və yerüstü piyada keçidini əhatə edəcək.

Yenilənmə başa çatdıqdan sonra hazırda Azərbaycan Avtomobil Yolları Dövlət Agentliyinin balansında olan avadanlıqlar Bakı Şəhər İcra Hakimiyyətinin balansına veriləcək.