Bakıda Könüllülərin Beynəlxalq Gənclər Forumu başlayıb

Bakıda Gənclər və İdman Nazirliyinin təşkilatçılığı ilə Könüllülərin Beynəlxalq Gənclər Forumu başlayıb.  

"Report" xəbər verir ki, forum MDB-yə üzv dövlətlərin 2020-ci ilə qədər dövr üçün “Gənclərin beynəlxalq əməkdaşlıq Strategiyası”nın 2018-2020-ci illərə dair Tədbirlər Planına uyğun olaraq keçirilir. 

Beynəlxalq tədbirdə Azərbaycan, Rusiya, Belarus, Qazaxıstan, Qırğızıstan, Özbəkistan, Tacikistan və Türkmənistanı təmsil edən 70-dən çox gənc nümayəndə iştirak edir.

Forumun keçirilməsində əsas məqsəd gənclər arasında könüllülük hərəkatının inkişaf etdirilməsi və gənclərin beynəlxalq əməkdaşlıq əlaqələrinin genişləndirilməsidir.

Forum çərçivəsində "Könüllülük - gənclərdə sosial məsuliyyət və vətəndaş mövqeyinin formalaşdırılması kimi", "Könüllülük hərəkatının inkişaf etdirilməsi vasitəsilə gələcəyin liderlərinin formalaşdırılması", “Könüllülük dəyərlərinin təbliğ olunması”, “Yerli və beynəlxalq tədbirlərdə könüllülük proqramları” və sair mövzularda sessiyaların keçirilməsi, fikir və təcrübə mübadiləsinin aparılması planlaşdırılır.

Tədbir oktyabrın 31-də başa çatacaq.