Bir-iki fincan, ya daha çox? - Həkim qəhvənin qan təzyiqini kəskin artıran miqdarını açıqlayıb

Qəhvənin orqanizmə təsiri onun istehlak miqdarından birbaşa asılıdır.

Ens.az Oxu.az-a istinadən xəbər verir ki, bu barədə rusiyalı kardioloq və tibb elmləri namizədi Valentina Baydina Lenta.ru nəşrinə verdiyi müsahibədə danışıb.

Həkim orqanizmə mənfi təsir göstərə biləcək qəhvə miqdarını açıqlayıb. Valentina Baydina bildirib ki, çox miqdarda - gündə iki-üç fincandan artıq qəhvə içmək qan təzyiqinin kəskin yüksəlməsinə və nəbzin sürətlənməsinə səbəb ola bilər. O, həmçinin xəbərdarlıq edib ki, stres və ya yuxusuzluq fonunda kofeinlə siqaretin birlikdə qəbulu xüsusi təhlükə yaradır: bu, qaçılmaz olaraq qan təzyiqinin kəskin artmasına və taxikardiyaya gətirib çıxarır.

Valentina Baydina qeyd edib ki, dərman qəbul edən hipertoniklər qan təzyiqləri stabil olduğu halda gündə bir fincan orta tündlükdə qəhvə içə bilərlər:

"Əgər səhər qan təzyiqi göstəriciləri bir qədər yüksək olursa və gün ərzində normala qayıdırsa, o zaman qəhvəni günün ikinci yarısına keçirmək olar. Eyni zamanda, qəhvəni südlə içmək daha məqsədəuyğundur: süd içkini durulaşdırır və qan damarlarına olan sərt təsirini azaldır", - deyə həkim məsləhət görüb.

Valentina Baydina əlavə edib ki, nəzarət olunmayan hipertoniyası olanlar, tez-tez təzyiqi yüksələnlər və ürək döyüntüsü sürətli olan insanlar qəhvədən tamamilə imtina etsələr, daha yaxşı olar. Həkim onu da izah edib ki, atmosfer təzyiqinin dəyişməsi səbəbindən sağlamlıq göstəricilərinin qeyri-sabit olduğu yaz və payız aylarında xüsusilə ehtiyatlı olmaq lazımdır.