Bu gün Azərbaycanın Milli Qəhrəmanı, Qarabağ müharibəsi şəhidi Pərviz Səmədovun anım günüdür

Mayın 15-i Azərbaycanın Milli Qəhrəmanı, Qarabağ müharibəsi şəhidi Pərviz Səmədovun anım günüdür.

Pərviz 1992-ci il fevralın 22-də könüllü olaraq cəbhənin Ağdam bölgəsinə gələrək komandir təyin edilir. Onun başçılıq etdiyi dəstə kəşfiyyat qruppası idi. Pərvizin güclü kəşfiyyat əməliyyatı nəticəsində ermənilərin xeyli sayda zirehli texnikası, silah-sursatının yeri bəlli olunaraq məhv edilir. O, doyüş yoluna Ağdam rayonundan başlamış, Şelli, Pircamal, Naxçıvanlı, Aranzəmin kəndlərinin düşməndən müdafiə və azad olunmasında rəşadətlə vuruşmuşdu. Pərviz gənc olmasına baxmayaraq, çox bacarıqlı və qorxmaz bir döyüşçü idi. 1992-ci il mayın 15-də Ağdamın Gülablı kəndi uğrunda çox gərgin döyüşlər gedirdi. Həmin döyüşdə Pərvizin də başçılıq etdiyi dəstə düşmənlə gərgin döyüşlərdə idi. Ermənilər bizimkilərin təcili yardım vertalyotunu vurmuşdular. Həmin vertalyotun ekipajını xilas etmək üçün Pərviz özünü irəliyə atır. 
Ekipajı xilas etsə də, mənfurların snayperdən açdığı atəş Pərvizin döyüş ruhu, vətən sevgisiylə döyünən qəlbini əbədi olaraq susdurur. Mayın 15-də ömrünün 22-ci baharında torpaqlarımızın azadlığı uğrunda gedən döyüşlərdə qəhrəmancasına şəhid olur.