Bu il İrəvandan Bakıya və əks istiqamətə neçə reys həyata keçirilib?

“Cari ilin yanvarından iyuna qədər İrəvandan Bakıya və əks istiqamətə iki dövlət reysi həyata keçirilib”.

Ens.az Qafqazinfo.az-a istinadən xəbər verir ki,  bunu “Sputnik Ermənistan”ın sorğusuna cavabında Ermənistanın Ərazilərin idarə olunması və İnfrastruktur Nazirliyindən bildirilib. 

“Bu il İrəvan-Bakı marşrutu üzrə 1 və eləcə də əks istiqamətə 1 uçuş həyata keçirilib. Hər iki halda təyyarə xarici yüksəkvəzifəli şəxsləri daşıyıb”, - deyə məlumatda qeyd olunub. 

Nazirlik, həmçinin bildirib ki, dövlət reyslərinin həyata keçirilməsinə icazə Ermənistan XİN tərəfindən verildiyindən, məsələ ilə bağlı əlavə məlumata sahib deyillər. 

Qeyd edilib ki, 2020-ci ildən İrəvan-Bakı-İrəvan marşrutu üzrə hava əlaqəsi yalnız beynəlxalq nümayəndə heyətlərinin daşınması üçün dövlət reysləri formatında həyata keçirilir. “Sputnik Ermənistan”ın məlumatına görə, həmin marşrut işə salındıqdan sonra 68 belə uçuş həyata keçirilib.