Cəlilabadda Aprel döyüşlərinin ildönümünə həsr olunmuş tədbir keçirilib

Cəlilabadda Aprel döyüşlərinin ildönümünə həsr olunmuş tədbir keçirilib

Cəlilabad rayon Heydər Əliyev Mərkəzində Aprel döyüşlərində qazanılan qələbənin ildönümünə həsr olunmuş tədbir keçirilib. 

Tədbirdə Cəlilabad Rayon İcra Hakimiyyətinin başçısı Rafiq Cəlilov, rayonun hüquq mühafizə orqanlarının rəhbərləri, Aprel döyüşlərinin iştirakçısı olan hərbi qulluqçular və ictimaiyyət nümayəndələri iştirak ediblər.

Əvvəlcə ölkəmizin ərazi bütövlüyü və müstəqilliyi uğrunda şəhid olan qəhrəman Vətən övladlarının əziz xatirəsi birdəqiqəlik sükutla yad edilib.

Tədbiri giriş sözü ilə açan Cəlilabad Rayon İcra Hakimiyyətinin başçısı Rafiq Cəlilov bildirib ki, 2016-cı ilin Aprel döyüşləri ölkə Prezidenti, Ali Baş Komandan İlham Əliyevin rəhbərliyi altında Azərbaycan əsgərinin döyüş və mənəvi-psixoloji hazırlığının, qələbə əzminin yüksək olduğunu nümayiş etdirdi. Bu döyüşlər dövlətin və ordunun gücünü, xalqın birliyini, həmrəyliyini, vətənpərvərliyini, Azərbaycanın heç vaxt işğalla barışmayacağını, nəyin bahasına olursa-olsun, ərazi bütövlüyünü bərpa etmək əzmini bir daha göstərdi. 

Rafiq Cəlilov  qeyd edib ki, Azərbaycan əsgəri əsl peşəkarlıq, intizam, yüksək döyüş ruhu nümayiş etdirərək düşmənin layiqli cavabını verib. Azərbaycan Ordusunun qazandığı qələbə ölkəmizin bütün vətəndaşları kimi Cəlilabad rayon sakinlərinin də böyük ruh yüksəkliyinə səbəb olub.

Daha sonra Aprel döyüşlərinin iştirakçıları çıxış edərək əsgər və zabitlərimizin göstərdikləri qəhrəmanlıqlardan və döyüş xatirələrindən danışıblar.

Çıxış edənlər ötən illər ərzində həmin döyüşlərin iştirakçılarına, eləcə də bütün şəhid ailələrinə və döyüşlərdə yaralanan hərbi qulluqçulara ölkə rəhbərliyi tərəfindən daim diqqət və qayğının göstərildiyini bildirib, Azərbaycan Prezidenti, Ali Baş Komandan İlham Əliyevə minnətdarlıqlarını ifadə ediblər.

Həmçinin 2016-cı ilin Aprel döyüşləri zamanı Vətənin müdafiəsində hərbi borcunu yerinə yetirərkən fədakarlıq və şücaət göstərmiş, xidməti vəzifələrini layiqincə yerinə yetirərək döyüş tapşırığının icrasında yüksək peşəkarlıq və əzm nümayiş etdirmiş hərbçilərə minnətdarlıq bildirilib.

Sonda Aprel döyüşləri haqqında qısametrajlı film nümayiş etdirilib.