Çıxarışı olan torpağın hasarı sökülüb: "Vətəndaş təzminatla bağlı iddia qaldıra bilər"

"Bakı şəhəri, Binə qəsəbəsində hasarı 1.5 hektar olan ərazinin sənaye təyinatlı çıxarışı var".

Bu barədə Oxu.Az-a sözügedən torpaq sahəsinin aid olduğu şirkətin hüquqşünası Naim Məmmədov məlumat verib.

O bildirib ki, torpağa dair mülkiyyət hüquqları olmasına baxmayaraq, söküntü qanunsuz olaraq aparılıb.

Vəkillər Kollegiyasının üzvü Pərviz Hacıyev mövzu ilə bağlı Oxu.Az-a hüquqi izah verib.

Pərviz Hacıyev qeyd edib ki, əgər mülkiyyəti təsdiq edəcək sənədlər qaydasındadırsa, söküntü aparılması qanunsuzdur:

"Bu halda vətəndaş qanunsuz hərəkətlərin dayandırılması ilə bağlı məhkəməyə müraciət edə və müvəqqəti təminat tədbiri çıxartdıra bilər. Daha sonra məhkəmədə qanunsuz hərəkətlərin dayandırılması və dəymiş ziyanın ödənilməsi ilə bağlı iddia qaldıra bilər".

Məsələ ilə bağlı Suraxanı Rayon İcra Hakimiyyətindən Oxu.Az-ın sorğusuna cavab olaraq bildirilib ki, sözügedən torpaq sahəsi hasara alınarkən vətəndaşa sözügedən torpaq sahəsinə dair hüquq müəyyənedici sənədlərin təqdim olunması xahiş olunsa da, o sənədləri təqdim etməkdən imtina edilib. Bu səbəbdən işlərin dayandırılması tikinti sahibinə tövsiyə edilib.

Burada maraqlı məqam ortaya çıxır. İcra hakimiyyəti özü elektron qaydada tikinti aparılan ərazinin sənədinin olmasını yoxlaya bilmir?

İşlərin dayandırılması mütləq hasarın sökülməsinin müşayəti ilə "tövsiyə" edilməlidir?

Niyə sənəd mühafizəçidən istənilib? Hər bir halda sənəd mülkiyyətçidə olur və həmin şəxsin əraziyə gəlməsi ən gec təqdirdə bir saat ərzində mümkün idi.

Bu və dəyən zərərin kimin qarşılayacağı ilə bağlı suallarımız isə icra hakimiyyəti tərəfindən cavabsız qaldı.

Qeyd edək ki, söküntünün aparıldığı yer Binə qəsəbəsinin Suraxanı rayonu ərazisinə təsadüf edir.