DAXİLİMİZDƏKİ NƏFSİMİZLƏ MÜBARİZƏDƏYİK – “NƏFS” SERİALININ AKTYORU TURAL ƏSGƏROV

Saytımız 10 oktyabrdan etibarən hər şənbə günü SPACE telekanalında yayımlanan yeni, maraqlı süjet xətti olan “NƏFS” serialının əsas obrazlarından “KAMAL” obrazına can verən istedadlı aktyor Tural Əsgərovla apardığımız müsahibəni sizlərə təqdim edir:

Nəzərinizə çatdırırıq ki, Ssenari müəllifi ELŞƏN İSMAYIL, Quruluşçu rejissoru NİCAT MANAF olan yeni bədii seriyalın aktyoru Əsgərov Tural Akif oğlu 1981-ci il, 21 sentyabrda doğulub, qız bürcündəndir.

1. Yaradıcı fəaliyyətiniz və ilk işiniz?

- Aktyor. İlk işim “Bacanaqlar” seriyalında olub.

2. Uğura inamınız və yaradıcılıqdakı nailiyyətləriniz?

- “Xoşbəxtlik doğru yerdə doğulmaqdı” sözünün doğruluq ölçüsü qədərdir uğura inamım.

       Nailiyyətlərə gəlincə, tam səmimi deyim, bu sahədə gözə çarpacaq qədər işlər görsəm də, bu uğurumla kifayətlənmək fikrində deyiləm. Hər zaman öz üzərimdə işləyib yeni-yeni təcrübələr qazanmağa çalışmışam. Mənim əsas devizim: zəhmət + istedad = uğur

3. Həyatdan gözləntiniz?

- Mənəvi sakitlik, həqiqi xoşbəxtlik, arzularımın reallaşması.

4. Yaradıcılıq planlarınız?

- Dəniz kənarında illərdir susaraq, boğulan və sonunda hayqıran birini oynamaq istərdim. Hər zaman insanların daxili aləmi və iç dünyası məni cəlb edib. Göründüyümüzdən ziyadə nə düşündüyümüz daha çox önəmlidir mənim üçün. 

5. Cəmiyyətimiz haqqındakı fikirləriniz?

- Çox dəyişdik, laqeyd olduq bir-birimizə. Soyuduq. Adi bir “ay can, əzizim, başına dönüm” kəlmələri qeyri-adi oldu.

6. Kinoda sevdiyiniz janr?

- Dram.

7. Yaradıcılığınızla insanlara demək istədikləriniz, ideyanız? 

- Təklik çox vaxt gözəldi... bir insanın saflığı – ondan istifadə etmək səbəbi deyil.

8. Bu seriyalın üstün və fərqli cəhətləri, insanlara tövsiyəniz. 

- Adından göründüyü kimi, daxilimizdəki nəfsimizlə mübarizədəyik.

      Tövsiyəyə gəlincə, heç kəsin heç kəsə qarışmamasını, insanların bir-birini olduğu kimi qəbul edib, azadlıqları, azad düşüncələri ilə birlikdə sevməsini istərdim. Qoy hər kəs ona verilən bu qısa ömrü azad, firavan, şən yaşasın... Bir filmdə dediyi kimi, mən azad bir ölkənin hürr vətəndaşıyam, qanadlarım olmasa da, ruhumla birlikdə uçmağa hazıram... 

Nəzərinizə çatdırırıq ki, sayt olaraq yeni başlamış olan “NƏFS” serialının əsas heyəti ilə sizləri yaxın zamanlarda tanış edəcəyik. Növbəti müsahibələri gözdən qaçırmayın.