Dubay dünya islam iqtisadiyyatının paytaxtı olmağı planlaşdırır

Dubay Əmirliyi dünya islam iqtisadiyyatının paytaxtına çevrilmək niyyətindədir. Bu məqsədlə maliyyə hüququ sahəsində ixtisaslaşan alimlərdən ibarət beynəlxalq islam liqası yaradılması planlaşdırılır.

AZƏRTAC “Arabian Business” nəşrinə istinadla xəbər verir ki, bu fikir Dubayın İslam İqtisadiyyatının İnkişafı Mərkəzinin (DIEDC) idarə heyətinin bu yaxınlarda keçirilmiş iclasında onun 2017-2021-ci illər üçün yenilənmiş strategiyası çərçivəsində səsləndirilib.

Birləşmiş Ərəb Əmirliklərinin iqtisadiyyat naziri və DIEDC-nin rəhbəri Sultan bin Səid Al-Mansurinin sədrliyi ilə keçirilən iclasda bir neçə təşəbbüs bəyənilib. Bunlardan biri islam liqasının və islam iqtisadiyyatı sektorlarının möhkəmlənməsi məqsədilə beynəlxalq maariflənmə platformasının yaradılması təşəbbüsüdür.

Sultan bin Səid Al-Mansuri bildirib ki, DIEDC mühüm təşəbbüslərin hazırlanmasını və həyata keçirilməsini davam etdirir. Bu təşəbbüslər inkişaf edən islam iqtisadiyyatı məhsullarına və xidmətlərinə yerli və beynəlxalq bazarlarda olan yüksək tələbatı təmin etməyə imkan verəcək. Onun sözlərinə görə, qlobal islam liqası dünyada ilk qeyri-kommersiya tipli beynəlxalq, hüquqi baxımdan müstəqil elmi orqan olacaq.

Qeyd olunur ki, beynəlxalq islam liqasının yaradılması “kapital bazarlarında, xüsusən sərmayələrin qloballaşdırılmasına münasibətdə sonuncu layihələrlə əlaqədar işlərin səmərəliliyini artıracaq”.

Digər təşəbbüs çərçivəsində DIEDC islam iqtisadiyyatının maariflənmə platformasının yaradılması məqsədilə Hamdan Bin Mohammed Smart Universiteti ilə əməkdaşlıq edəcək. Bu əməkdaşlıq təhsil müəssisələri üçün islam iqtisadiyyatının prinsip və etikasının mənbə rolunu oynayacaq.

Asya Hacızadə

AZƏRTAC-ın xüsusi müxbiri

Abu-Dabi