Fatih Terim Avropa klubuna baş məşqçi gedir – KİV

Məşhur türkiyəli baş məşqçi, “Qalatasaray”ın əfsanəsi hesab olunan “İmperator” ləqəbli Fatih Terimin yeni klubla razılaşdığı bildirilir.

Ens.az Yeniavaz.com-a istinadən xəbər verir ki,bu barədə TRT məlumat yayıb.

Bildirilir ki, təcrübəli baş məşqçi Yunanıstanın “Panatinaikos” klubu ilə razılaşıb.

“Onun yaxın müddət ərzində klubla müqavilə bağlaması gözlənilir”, - nəşr yazır.

Terimin 1,5 illik müqavilə imzalayacağı gözlənilir.

Qeyd edək ki, sonuncu dəfə 22 dekabr 2017-ci ildə “Qalatasaray”a baş məşqçi gətirilən Terim ilk 2 mövsümdə klubu Super Liqa çempionu etməyi bacarıb. Təcrübəli çalışdırıcının rəhbərliyi altında 2019-cu ildə həm Türkiyə kubokunu, həm də Superkuboku qazanan sarı-qırmızılılar son 2 mövsümdə gözləntiləri doğrulda bilməyib.

2022-ci ilin yanvar ayında isə istənilən nəticəni ala bilməyən və çempionluq yarışından uzaqlaşan “Qalatasaray” rəhbərliyi təcrübəli məşqçi ilə yollarını ayırıb.

Xatırladaq ki, onun adı hazırda Türkiyənin ən populyar məhkəmə proseslərindən birində hallanır.