Gəncədə incəsənətlə məşğul olan gənclər bir araya gəlib.

Gəncədə incəsənətlə məşğul olan gənclər bir araya gəlib. 

Gəncə şəhərində baş tutan "Azərbaycanın İncə İrsi İncəsənət" layihəsi incəsənətin fərqli sahələri ilə məşğul olan gəncləri bir araya gətirib. İki mərhələdən ibarət olan layihədə gənc rəssamlar və musiqiçilər öz bacarıqlarını sərgiləyiblər.   

Layihənin birinci mərhələsi olaraq, 4 mart 2023-cü il tarixində rəsm və musiqi sahəsi ilə maraqlanan gənclərin istedadının önə çıxarılması məqsədilə tədbir həyata keçirilib. Keçirilən tədbir çərçivəsində rəsm qabiliyyəti olan gənclər tərəfindən vətənpərvərlik mövzusunda əl işləri nümayiş etdirilib, rəsmin "Face art" istiqaməti üzrə masterklaslar və əyləncəli proqram təşkil olunub. Müxtəlif yaş qruplarından olan musiqiçi gənclər isə əsasən, milli musiqilərdən ibarət əsərlər ifa ediblər.

5 mart tarixində keçirilən ikinci mərhələdə isə iştirakçılar Monumental rəngkarlıq növü olan Freska (boya vasitəsilə suvaq üzərinə çəkilən rəngkarlıq əsəri) üslubu ilə divar üzərində boyalarla milli-mənəvi dəyərləri əks etdirən sənət əsərləri çəkiblər.

Layihə birinci mərhələdə 61, ikinci mərhələdə isə 7 iştirakçı olmaqla ümumilikdə 68 nəfər gənci əhatə edib.

Layihə Azərbaycan Respublikasının Gənclər Fondunun "İdeyanı Reallaşdır 2022" fərdi qrant müsabiqəsinin qalibi olmuş layihələrdən biridir və Azərbaycan Respublikasının Gənclər Fondunun maliyyə dəstəyi, Gənclərin İnkişaf və Karyera Mərkəzinin Gəncə nümayəndəliyinin və Gəncə şəhər Uşaq-Gənclər İnkişaf Mərkəzinin tərəfdaşlığı ilə həyata keçirilib.