Gəncədə Türkiyənin Cümhuriyyət bayramı qeyd edilib

Gəncədə Türkiyə Cümhuriyyətinin elan olunmasının 95-ci ildönümünə həsr olunan tədbir keçirilib. Türkiyənin Gəncədəki Baş Konsulluğunun təşkilatçılığı ilə baş tutan tədbirdə dostluq və birlik mesajları verilib.

Türkiyə Cümhuriyyətinin elan olunmasının 95-ci ildönümünə həsr olunan tədbirdəTürkiyənin Gəncədəki Baş konsulu Zeki Öztürk, Gəncə Şəhər İcra Hakimiyyətinin başçısı Niyazi Bayramov,  idarə, müəssisə rəhbərləri və şəhər ziyalıları iştirak ediblər.

Gəncə Dövlət Filarmoniyasının foyesində “Türk-Osmanlı arxivlərində Qafqaz” adlı sərginin açılışı olub. Sərgidə Türkiyə arxivlərində saxlanılan vəbirbaşa Qafqazla, o cümlədən Azərbaycanla bağlı olan məlumatlar, aparılan yazışmalar, məktublar və bir sıra başqa sənədlər öz əksini tapıb.

Tədbirin rəsmi hissəsi Azərbaycanın və Türkiyənin dövlət  himnlərinin səsləndirilməsi ilə başlayıb. Daha sonra Türkiyə prezidenti Rəcəb Tayyib Ərdoğanın Cümhuriyyətin 95-ci ildönümü münasibətilə videomüraciəti izlənilib.

Türkiyənin Gəncədəki Baş konsulu Zeki Öztürk çıxış edərək, türk xalqının istiqlal mübarizəsindən, Türkiyə Cümhuriyyətinin bugünkü inkişaf  və tərəqqisindən danışıb. Zeki Öztürk: “Türkiyədə hazırda ikiqat bayram yaşanır. Bilirsiniz ki, İstanbulda dünyanın ən böyük aeroportunun açılışı baş tutub. Bu bizim üçün çox böyük əhəmiyyət kəsb edir” — deyib. Zeki Öztürk Türkiyənin dost və qardaş Azərbaycanla əlaqələrinin inkişafında Gəncə şəhərinin də rolundan danışıb.  Gəncənin Azərbaycan Xalq Cümhuriyyətin ilk paytaxtı kimi tarixi önəmindən, qardaş ölkəyə dəstək vermək məqsədi ilə Nuru Paşanın öz silahdaşları ilə məhz Gəncəyə gəlməsindən, burada onlara göstərilən isti münasibətdən söz açıb.

Gəncə Şəhər İcra Hakimiyyətinin başçısı Niyazi Bayramov Türkiyə Cümhuriyyətinin elan olunmasının 95-ci ildönümü münasibətilə tədbir iştirakçılarını təbrik edərək, Türkiyəyə davamlı sülh, firavanlıq, yeni nailiyyətlər arzulayıb. Niyazi Bayramov bildirib ki, Azərbaycan-Türkiyə münasibətləri milli, mənəvi və mədəni dəyərləri ilə bir-birinə eyni köklərləbağlı olan xalqlarımızın iradəsindən qaynaqlanır. Ölkələrimiz və xalqlarımız arasında möhkəm tərəfdaşlığa Azərbaycanın Gəncə şəhəri ilə Türkiyənin şəhərləri arasındakı əməkdaşlıq da öz töhfəsini verməkdədir. 

Çıxışlardan sonra Gəncə Dövlət Filarmoniyasının Kamera Orkestrinin ifasında Azərbaycan və türk musiqisi nümunələri səsləndirilib. Gəncə Musiqi Kollecinin tələbələrinin təqdim etdiyi rəqs nümunəsi hər kəsin zövqünüoxşayıb.

Rəsmi hissədən sonra tədbir iştirakçıları üçün ziyafət təşkil olunub.

Mənbə: Gəncəninsəsi.com