Gürcüstanın XİN başçısı: Azərbaycanla münasibətlər bizim üçün çox önəmlidir

Gürcüstanın XİN başçısı: Azərbaycanla münasibətlər bizim üçün çox önəmlidir

“Gürcüstan üçün ilk növbədə qonşu ölkələrlə - Azərbaycan, Ermənistan, Türkiyə ilə, sonra isə daha geniş regionda münasibətlər çox önəmlidir”.

Ens.az Teleqraf.Az-a istinadən xəbər verir ki,bunu Gürcüstanın Xarici işlər naziri Maka Boçorişvili “İmedi” telekanalının efirində yayımlanan “Günün xronikası” proqramında deyib.

XİN başçısının sözlərinə görə, Gürcüstan Orta Dəhlizdə mövqelərini möhkəmləndirməyi hədəfləyib.

M.Boçorişvili söyləyib: “Qərb və Şərq tərəfdaşlarımızla dialoq zəruridir və bu əməkdaşlıq Orta Dəhlizin fəaliyyətinə və ondan optimal istifadəyə yönəlməlidir. Bu məqsəldə hökumətin nümayəndə heyəti qonşu ölkələrdə səfərdə olub”.

Nazir qeyd edib ki, Mərkəzi Asiya ölkələrinə də səfərlər planlaşdırılıb, belə ki, onlarla əlaqələri gücləndirmədən Gürcüstan üçün Orta Dəhlizdəki funksiyasını yerinə yetirmək çox çətin olacaq.