Hacı Şahinin yerinə təyin olunan Şərbətov kimdir?

Xəbər verdiyimiz kimi, “Məşədi Dadaş” məscidinin imamı mərhum Hacı Şahin Həsənlinin yerinə təyinat olub.

Ölkə.az bildirir ki, Dini Qurumlarla İş üzrə Dövlət Komitəsinin sədri Mübariz Qurbanlının əmri ilə Hacı Əli Şərbətov “Məşədi Dadaş” məscidinə yeni imam təyin olunub.

46 yaşlı Əli Şərbətov keçmiş Bakı İslam Universitetində ali təhsil alıb.

Daha sonra Qafqaz Müsəlmanları İdarəsinin təşəbbüsü ilə Liviyaya oxumağa göndərilən Şərbətov 2000-2019-cu illərdə İslam Universitetində müəllim işləyib.

Saray Cümə məscidi və Ceyranbatan məscidində imam olaraq çalışan Əli Şərbətov bu gün Məşədi Dadaş məscidinə imam vəzifəsinə təyin olunub.

Hacı Şahin Həsənlinin xələfi sosial şəbəkələrdə o qədər də tanınmır. O, “Facebook” və “İnstagram” kimi populyar sosial şəbəkələrdə fəaliyyətə həvəs göstərmir. Əli Şərbətov dini sferada təmsil olunduğu çoxillik zaman kəsiyində cəmi bir-iki dəfə “YouTube” üzərindən fəaliyyət göstərən dini kanallarda qonaq olub.

İnternet resurslarında Hacı Əli Şərbətovun şəxsi həyatı ilə bağlı hər hansı informasiya yoxdur.