Heydər Əliyevin ideyaları Azərbaycan xalqının amallarına xidmət etməkdədir - Bahar Muradova

Ulu öndər Heydər Əliyev zamanın xalqımızın qarşısına çıxardığı bütün çətinlikləri, problemləri özünün müdrik siyasəti ilə və xalqın gücü ilə dəf etməyi bacarıb və xalqımızın min illik müstəqil dövlətçilik arzusunu reallığa çevirib.

Ens.az Trend -ə istinadən xəbər verir ki,  bunu jurnalistlərə açıqlamasında Ailə Qadın və Uşaq Problemləri üzrə Dövlət Komitəsinin sədri Bahar Muradova deyib.

O bildirib ki, Azərbaycan xalqı, Azərbaycan dövləti durduqca Heydər Əliyevi yad edəcək.

“Heydər Əliyevin ideyaları bu gün də, gələcəkdə də Azərbaycan xalqının müqəddəs amallarına xidmət etməkdədir və mən inanıram ki, gənc nəslimiz bu ideyalardan ruhlanaraq, Azərbaycanın gələcəyi üçün hazırlayır. Heydər Əliyevin qəhrəmanlığı və fədakarlığı hər bir Azərbaycan vətəndaşı üçün örnəkdir”, - deyə B.Muradova əlavə edib.

Qeyd edək ki, dekabrın 12-si Azərbaycan xalqının Ümummilli Lideri Heydər Əliyevin anım günüdür. Dövlət və hökumət rəsmiləri, hərbi qulluqçular, hüquq-mühafizə orqanlarının əməkdaşları, diplomatik korpusun nümayəndələri Fəxri xiyabanda Ümummilli Lider Heydər Əliyevin məzarını ziyarət edərək abidəsi önünə gül dəstələri qoyub, müasir müstəqil Azərbaycanın banisi və qurucusu Ulu Öndərin xatirəsinə dərin ehtiramlarını bildiriblər.

Ulu Öndərin ömür-gün yoldaşı, görkəmli oftalmoloq-alim, akademik Zərifə xanım Əliyevanın da xatirəsi anılıb, məzarı üzərinə gül dəstələri qoyulub.