Honq Konqda koronavirusun insandan heyvana ötürülməsi halı aşkar edilib

Ens.az saytı bir müddət öncə bildirmişdi ki, Honq Konqda koronavirusun insandan heyvana ötürülməsinin mümkün olub-olmaması ilə bağlı araşdırma aparılır. Artıq adı çəkilən ölkənin hakimiyyət orqanları burada bir itin "aşağı infeksiya nisbəti"ndə koronavirusa yoluxduğunu təsdiqləyiblər və onu karantinə alıblar. Bu barədə Honq Konq Kənd Təsərrüfatı, Balıqçılıq və Təbiəti Mühafizə İdarəsi məlumat yayıb.

Agentliyin nümayəndəsi ev itinin analizləri dəfələrlə (ən azı üç dəfə) COVID-19 virus infeksiyasının aşağı səviyyəsində müsbət nəticə verdiyini söyləyib.

Agentliyə məsləhət verən mütəxəssislər, bunun virusun insan-heyvan yolu ilə ötürülməsi hadisəsi ola biləcəyini birmənalı şəkildə qəbul ediblər: çünki həmin sahibinə də əvvəllər COVID-19 diaqnozu qoyulub.

Ancaq itdə xəstəliyin əlamətləri müşahidə olunmur. Hazırda ev heyvanı karantindədir.

Müvafiq departamentin əməkdaşları iti izləməyə davam edəcək və daha sonra testi yenidən təkrarlayacaq. Heyvan yalnız test nəticəsi mənfi olduqda sahibinə qaytarılacaqdır.

Departament, COVID-19 hallarının təsdiq olunduğu evlərdə saxlanan ev heyvanlarını (məməliləri), o cümlədən it və pişikləri karantinə almağı tövsiyə edir. Həm də ev heyvanlarının sahiblərinə ev heyvanları ilə təmasdan əvvəl və sonra əllərini yuyub, onlarla öpüşməməsi lazım olduğunu xatırladır. Xəstə insanlar heyvanlarla əlaqəni məhdudlaşdırmalıdırlar. Heyvan sahibləri ev heyvanlarının sağlamlığında hər hansı bir dəyişiklik görsə, ən qısa müddətdə baytara müraciət etməlidirlər.

Agentliyin nümayəndəsi, hazırda ev heyvanlarının COVID-19 infeksiyası mənbəyi ola biləcəyinə və ya xəstələndiyinə dair heç bir dəlil olmadığını vurğulayıb. Düzgün gigiyena qaydalarına riayət etməklə yanaşı, ev heyvanlarının sahibləri həddindən artıq narahat olmamalı və heç bir vəziyyətdə ev heyvanlarından imtina etməməlidirlər.

Mənbə: 42.tut.by