İbtidai sinif müəllimləri ayda 1 dəfə pulsuz koronavirus testindən keçiriləcək? - AÇIQLAMA

Bu gündən Azərbaycanda ibtidai siniflər üçün dərslər başlayıb. Qeyd edək ki, dərslər Bakıda həftədə 2, regionlarda 3 dəfə ənənəvi şəkildə keçiriləcək. İbtidai sinif müəllimləri ayda bir dəfə dövlət hesabına koronavirus testindən keçiriləcəklərmi?

Ens.az xəbər verir ki, bununla bağlı KONKRET.az-ın sualını cavablandıran Təhsil Nazirliyinin İctimaiyyətlə əlaqələr sektorunun müdiri Cəsarət Valehov bildirib ki, hər gün müəllimlər və şagirdlər dərsə başlamazdan öncə hərarətləri ölçüləcək. Özündə hər hansı bir narahatlıq hiss edən müəllimlər dərsə buraxılmayacaq. Hazırda bütün müəllimlərin kütləvi şəkildə koronavirus testindən keçirilməsi məsələsi müzakirə olunmur”.

Deputat Müşfiq Cəfərov söyləyib ki, uşaqların koronavirusa yoluxma halları çox aşağıdır, amma buna baxmayaraq onların qorunması üçün mart ayından məktəblərdə dərslər onlayn keçirilib:

“Bu gündən artıq ibtidai siniflər üçün dərslər başlayır. Uşaqların koronavirusdan keçirilməsi çətindir. Amma gündəlik temperaturun ölçülməsi və sosial məsafənin qorunması məsələləri mütləq olmalıdır. Əgər müəllimlər arasında yoluxma halları çoxalarsa, məncə artıq testdən keçirilmə qaçılmaz olacaq. Düzdür, siniflər iki yerə bölünsə belə bir neçə saat müəllim və şagirdlər bir otaqda olur. Məktəblərdə yoluxma baş verərsə, müəllimlər dövlət hesabına ayda bir dəfə koronavirus testindən keçirilə bilərlər”.