İKT vasitələrində axtarış və götürmə proseduru genişlənir

Cinayət-Prosessual Məcəlləsində axtarış və ya götürmənin aparılması qaydaları genişlənir.

Ens.Az-ın məlumatına görə, sözügedən məsələ Milli Məclisin Hüquq siyasəti və dövlət quruculuğu komitəsinin bugünkü iclasında müzakirəyə çıxarılıb.

Sənəddə qeyd olunub ki, əldə olunan sübutlar və ya əməliyyat-axtarış fəaliyyətinin materialları sistemində, hər hansı İKT onun hissələrində, elektron verilənlərin saxlanıldığı daşıyıcılarda və ya elektron verilənlərdə iş üzrə sübut əhəmiyyətinə malik ola biləcək məlumatların olmasını güman etməyə kifayət qədər əsas verdikdə, həmin sistemdə, onun hissələrində, elektron verilənlərin saxlanıldığı daşıyıcılarda və elektron verilənlərdə axtarış aparıla və İKT sistemi, onun hissələri, elektron verilənlərin saxlanıldığı daşıyıcılar və ya elektron verilənlər götürülə biləcək.

Həmçinin axtarış və ya götürmənin aparılması üçün əsaslara əlavələr təklif olunur.

Belə ki, şəxsiyyət və ya dövlət hakimiyyəti əleyhinə cinayətin törədilməsinə və ya həmin cinayətin törədilməsinə hazırlığın aparılmasına dəlalət edən İKT sisteminin, onun hissələrinin, saxlanıldığı elektron verilənlərin daşıyıcıların və ya elektron verilənlərin gizlədilməsini, məhv edilməsini məhkəmənin qərarı olmadan güman etməyə əsas verən dəqiq məlumat hesab edilə bilər.