İmadəddin Nəsimi - Düşdüm əzəldə zülfünə, dam olmadan hənuz
Düşdüm əzəldə zülfünə, dam olmadan hənuz,
İçdim ləbin şərabını, cam olmadan hənuz.
Gördüm üzünü Kə’bədə əhli-səfa ilə,
Qıldım təvafi-Kə’bə, həram olmadan hənuz.
Yazmış üzündə surеyi-rəhman ələssəlam,
Ərş ilə kürsü, lövhü qələm olmadan hənuz.
Gördüm üzünü nuri-təcəllivü şövqünü
Ayü günəşdən nuri-qiyam olmadan hənuz.
Dürdanə dişlərini nigarın görəndə mən,
Dürrə sədəfdə nəzmü, nizam olmadan hənuz.
Vəchində yazmış idi anın yirmi səkkiz hərf,
Хətti-bəyani-hərfü kəlam olmadan hənuz.
Görmüş idi üzündə Nəsimi nişani-həq,
Ol dəm nişani-sübh ilə şam olmadan hənuz.
Məqaləni bəyəndiniz? Sosial şəbəkələrdə izləyin!
Şərhlər
Şərhləri göstər Şərhləri gizlət