Mirkazim Nikbin - Anla məni
Danlayırsan? - danla məni,
Sənə yoxdu etirazım.
Anlamırsan: - anla məni,
Sənsən mənim tale payım.
Cismimdən canı almısan,
Məni odlara salmısan,
Qəlbimə calaq olmusan,
Vüsalındır tək murazım.
Gülüstanda çiçək çoxdu,
Amma sənin tayın yoxdu,
Bu dünyada gözüm toxdu,
Mənə ey yar eşqin lazım.
Sanma ki, məndən uzaqsan,
Könlümdə əziz qonaqsan,
Dünyama şərik, ortaqsan,
Sənsən bil baharım, yazım.
Səni görçək yazıq könlüm,
Sanki dönür, olur bülbül,
Bunu anlamaq çox müşkül,
Sənsən mənim xoş avazım
Məqaləni bəyəndiniz? Sosial şəbəkələrdə izləyin!
Şərhlər
Şərhləri göstər Şərhləri gizlət