Mirkazim Nikbin - Yaxşıdı

Mirkazim Nikbin - Yaxşıdı

Bu həyatda dünyaya yük olanlar,
Ölüb girsə dar məzara yaxşıdı.
Hər şey üçün atma canı alova,
Qan-qadadan qaç kənara yaxşıdı.

Hər şeyin var öz yeri, öz zamanı,
Lazım olar saxlaginən samanı,
Qışda çiçək deyib gəzmə obanı,
Gülüstanda gül bahara yaxşıdı.

Bu dünyadan əhdə vəfa gözləmə,
Yaxşı olan yamanları izləmə,
Öz içində özgələri gizləmə,
Nəyin varsa tök aşkara yaxşıdı.

Mən-mən deyib alovlanma alışma,
Nahaqqlarla əlbir olub, çalışma,
Doğrunu sev, yalanlarla barışma,
Haqq yolunu el axtara yaxşıdı.

İnsan çətinlikdə bişir, düzəlir,
İnsan çətinliklə qalxır, dirçəlir,
Əzab çəkən hər kəs sonda dincəlir,
Öyrənməsə baş tumara yaxşıdı.

Ey gözəl yar səndən vəfa gözlərəm,
Dərdlərimə dərman dəva gözlərəm,
Cəfa deyil , eşqdən səfa gözlərəm,
Sözüm çatsa o nigara yaxşıdı.

Mirkazim yaşamaq inan gözəldi,
Qəlbim söz dinləmir yaman dəcəldi,
Əlimdə qələmin ilhama gəldi,
Yazsa düşüncəmi əşara, yaxşıdı.