Monqolustanda qızılca epidemiyası: Minlərlə yoluxma, ilk ölüm halı

Monqolustanda qızılcaya yoluxma hallarında kəskin artım müşahidə olunur. Yoluxanların sayı minlərlədir, bu da xüsusilə uşaqları ilə birlikdə təcili yardım üçün müraciət edən vətəndaşlar arasında sıxlıq və növbələrin yaranmasına səbəb olub.

Ens.az Oxu.az-a istinadən xəbər verir ki, bu barədə məlumatı Monqolustanın Yoluxucu Xəstəliklər üzrə Milli Mərkəzinin Mətbuat Xidməti yayıb.

Bildirilir ki, qızılca epidemiyası o həddə çatıb ki, mərkəz artıq vətəndaş axını ilə bacara bilmir.

"Uşaqları ilə birlikdə təcili yardım gözləyən ailələr uzun növbələrdə gözləməli olurlar. Əgər 26 may tarixində laboratoriya tərəfindən təsdiqlənmiş 3.3 min yoluxma qeydə alınmışdısa, 29 may tarixinə bu rəqəm dörd minə yaxınlaşıb", - deyə Mərkəzin açıqlamasında bildirilir.

Hazırda xəstələrlə təmasda olmuş 44 min 774 nəfər həkim nəzarətində saxlanılır. Ən çox yoluxma halları məktəblərdə qeydə alınır. Bəzi siniflərdə iki uşaqdan biri qızılcaya yoluxub. Yoluxanların təxminən 40 faizi 10-14 yaş arası uşaqlardır, daha 22 faizi isə 4 yaşadək körpələrdir.

Monqolustanda ilk beş yoluxma 2025-ci ilin fevral ayının sonunda xarici aviareyslərlə ölkəyə daxil olan şəxslərdə aşkar edilib. İlk ölüm halı 13 may tarixində qeydə alınıb.

Xatırladaq ki, Ümumdünya Səhiyyə Təşkilatı 2016-cı ildə Monqolustanı qızılcanın ləğv edildiyi ölkə kimi tanımışdı. Lakin sonuncu böyük yoluxma dalğası 2019-cu ilin mart ayında uşaqlar arasında qeydə alınmışdı.