Mövsümün ilk 'El-Klasiko'su: Bu gün “Barselona” “Real Madrid”i qəbul edəcək

Bu gün İspaniya La Liqasının X turundan təxirə salınmış “Barselona” - “Real Madrid” oyunu keçiriləcək.

“Report” xəbər verir ki, “Kamp Nou” stadionunda baş tutacaq matç Bakı vaxtı ilə saat 23:00-da start götürəcək. Görüşü Tenerifedən olan baş hakim Alexandro Xose Ernandes idarə edəcək.

Təqvimə əsasən, cari mövsümün ilk “El-Klasiko”su oktyabrın 26-da olmalı idi. Lakin qarşılaşma Kataloniyanın müstəqilliyi tərəfdarlarının etiraz aksiyaları üzündən təxirə salındı. Hərçənd mitinqlər hazırda da səngiməyib. Bu üzdən komandalar matç öncəsi eyni oteldə məskunlaşıblar. Oyunda təhlükəsizlik xidmətinin 3000 əməkdaşı çalışacaq. Hər iki kollektiv oteldən eyni vaxtda fərqli avtobuslarla çıxacaq. Onları 12 polis avtomobili müşayiət edəcək. Otel stadiondan 750 metr aralıda yerləşir ki, bu da bloklamanın baş verməməsi üçün seçilib.

Əzəli rəqiblər La Liqada 16 oyundan 35 xal toplamaqla liderliyi bölüşürlər. “Barselona” cari çempionatda 11 qələbə qazandığı halda, 3 dəfə uduzub və 2 dəfə heç-heçə edib. “Real Madrid” isə 10 görüşdən qalib ayrılıb. Cəmi 1 dəfə uduzan paytaxt təmsilçisi 5 dəfə bərabərə qalıb.

Artıq hər iki komanda “El-Klasiko” üçün “18-lik”lərini açıqlayıb. “Barselona”nın baş məşqçisi Ernesto Valverde zədəli hücumçu Usman Dembelenin xidmətindən yararlana bilməyəcək.

Qapıçılar: Mark-Andre ter Ştegen, Neto

Müdafiəçilər: Nelson Semedu, Jerar Pike, Kleman Lanqle, Jordi Alba, Samuel Umtiti

Yarımmüdafiəçilər: İvan Rakitiç, Serxio Buskets, Karles Alenya, Serxi Roberto, Frenki de Yonq, Arturo Vidal

Hücumçular: Luis Suares, Lionel Messi, Antuan Qrizmann, Karles Sayol, Ansu Fati

“Real Madrid”in baş məşqçisi Zinəddin Zidan isə zədə üzündən müdafiəçi Marselo, yarımmüdafiəçi Xames Rodriges və hücumçu Eden Azarı “18-liy”ə daxil edə bilməyib.

Qapıçılar: Tibo Kurtua, Alfons Areola, Dieqo Altube

Müdafiəçilər: Daniel Karvaxlar, Eder Militao, Serxio Ramos, Rafael Varan, Naço Fernandes, Ferlan Mendi

Yarımmüdafiəçilər: Toni Kroos, Luka Modriç, Kazemiro, Federiko Valverde, İsko

Hücumçular: Kərim Benzema, Luka Yoviç, Vinisius Junior, Rodriqo Qoes, Qaret Beyl

Qeyd edək ki, bu komandalar indiyə qədər bütün turnirlərdə 275 dəfə qarşılaşıblar. Onlardan 115-də “Barselona”, 99-da “Real Madrid” qalib gəlibsə, 61 matçda heç-heçə qeydə alınıb. Kataloniyalılar top fərqində də üstündürlər – 482:446.