Mücrüm Kərim - Ona

Munda kim var deyim yari-vəfadarım ona, 
Çəkibən xəlvətə bir sir açım əsrarım ona, 
Göstərim dağü-dilim, söyləyim azarım ona, 
Hanı bir dərdi bilən bir para, yalvarım ona.

Qiblədən qaşları yay kilsəyə döndərdi məni, 
Ay kimi əhli-şəhər bir-birə göstərdi məni, 
Yay kimi əydi bu bidərdlilərin dərdi məni, 
Hanı bir dərdi bilən bir para, yalvarım ona.

Pəri tələtli sənəm çox, vəli adəmliyi yox.
Başadək bir kəs ilən həmrəhü-həmdəmliyi yox, 
Eyləsə mehrü-vəfa, zərrəcə möhkəmliyi yox.
Hanı bir dərdi bilən bir para, yalvarım ona.

Haçanadək qəmi-hicrana düşüb, qəmdə ölüm, 
Ruzi-vəslinə onun yetməsəm ol dəmdə ölüm, 
Dəymə Mücrim Kərəmə, qoy məni ölsəm də ölüm, 
Hanı bir dərdi bilən bir para, yalvarım ona.