Mücrüm Kərim - Yetirrəm

Könül, səbr et, gəl eyləmə əlaman, 
Səni bir gün o dildara yetirrəm. 
Ağlayıban növnə etmə şivəni, 
Şahqubada, o sərdara yetirrəm.

Bilirəm, qəriblik aldı qərarım, 
Çəkəcəksən hələ dərdini yarın. 
Kəsilibdi səbri bülbüli-zarın, 
Fəsli-bahar, gülüzara yetirrəm.

Kəriməm, halımdı çox-çox pərişan, 
Əritdi cismimi atəşi-hicran.
Hanı, bu dünyada yoxdu bir insan, 
Deyə: səni mən o yara yetirrəm.