Neft gəlirləri hara xərclənir? – Millət vəkili

“Əsrin müqaviləsi”nin imzalanması tarixi hadisədir. Prezidentin də qeyd etdiyi kimi, bu kontraktın faydasını bu gün Azərbaycan dövləti və xalqı görür.

Bu sözləri Axar.az-a millət vəkili Aydın Mirzəzadə “Əsrin müqaviləsi”nin 25 illiyi və Neftçilər Günü münasibətilə keçirilən mərasimdə Prezident İlham Əliyevin çıxışı haqqında danışarkən deyib. O bildirib ki, ölkədə gedən quruculuq və abadlıq işlərinin təməlində neft sənayemiz dayanır:

“Əsrin müqaviləsi”nin 25 illik yubileyinin qeyd edilməsi və ölkə başçısının çıxışı həmin müqavilənin zamanında düzgün bağlandığını bir daha sübut edir. Ölkə başçısı çıxışında həmin müqavilənin əhəmiyyətindən və onun bağlanmasının çətinliklərindən danışdı. Həqiqətən o dövrdə belə bir müqavilənin bağlanmasına nail olmaq o qədər də asan məsələ deyildi. Amma Ulu öndər Heydər Əliyev bu müqavilənin bağlanmasına nail ola bildi. Bu gün ölkəmizdə gedən inkişafın təməlində Heydər Əliyevin düzgün və dəqiq qərarları dayanır. Ölkə başçısı İlham Əliyev də atılan bu doğru addımlardan yola çıxaraq Ulu öndərin siyasətini davam etdirir”.

Millət vəkili neftdən əldə edilmiş gəlirlərin ölkəmizin sürətli inkişafına, yaşayış səviyyəsinin yaxşılaşdırılmasına şərait yaratdığını bildirdi:

“Neftdən gələn gəlirlərin əhalinin sosial rifahının yaxşılaşdırılması, qeyri-neft sektorunun inkişafına yönəlməsi Azərbaycan dövlətinin düşünülmüş daxili və xarici siyasətinin olmasından xəbər verir. Şəhid ailələrinə, müharibə veteranlarına güzəştlər, müavinətlər, mənzillər, minik avtomobilləri verilməsi bunun əyani sübutudur. Həmçinin, hesab edirəm ki, Azərbaycan vaxtı ilə təşəbbüs göstərdiyi bu layihəni həyata keçirməklə ümumilikdə regionun və dünyanın inkişafına böyük töhfə vermiş oldu”.