Niyazi Bayramovun başçılıq etdiyi nümayəndə heyəti “Batumoba 2019” - da iştirak edib

27-29 Aprel 2019-cu il tarixləri arasında Gürcüstanın Batumi şəhərində  “Batumoba 2019” adı altında şəhər günləri keçirilib. Şəhər Bələdiyyəsinin təşkil etdiyi tədbir Batumininin 131 illiyinə həsr olunub. Tədbirdə Gəncə Şəhər İcra Hakimiyyətinin başçısı Niyazi Bayramov, Milli Məclisin deputatı Xanlar Fətiyev,  Gəncə şəhər Mənzil-Kommunal Təsərrüfatı İstehsalat Birliyinin rəisi İlham Quliyev, Gəncə şəhər Gənclər və İdman Baş İdarəsinin rəisi Müşfiq Cəfərov, eləcə də Azərbaycan Respublikasının Gürcüstandakı fövqəladə və səlahiyyətli səfiri  Dursun Həsənov və Batumi şəhərindəki Baş konsulu Pərviz İsmayılzadə iştirak ediblər.

“Batumoba 2019”-nun açılış mərasimində çıxış edən Gəncə Şəhər İcra Hakimiyyətinin başçısı Niyazi Bayramov Batumi şəhərinin sakinlərini bayram münasibətilə təbrik edib, 2019-cu ilin hər iki şəhər üçün əhəmiyyətli bir il olduğunu vurğulayıb. O bildirib ki, bu il Gəncə və Batumi Avropanın İdman Şəhəri titulunu daşıyırlar. Bu Qafqazda bir ilkdir. O həmçinin, hər iki ölkənin qədim və yaxın tarixindən, Ümummilli Lider Heydər Əliyevin söylədiyi faktlardan söz açıb, Azərbaycan Respublikasının Prezidenti İlham Əliyevin dediyi fikirlərə istinad edərək, Azərbaycan və Gürcüstanın strateji tərəfdaş olmasından danışıb. Niyazi Bayramov qeyd edib ki, Azərbaycanla Gürcüstanı sadəcə iqtisadi deyil, həm də mədəni, təhsil, turizm layihələri birləşdirir.

Tədbirdə iştirak edən şəhərlərin merləri və vitse-merləri arasında fikir mübadiləsi aparılıb.

Rəsmi hissə başa çatdıqdan sonra şəhər gəzintisi baş tutub. Batumi şəhərinin sakinləri və  qonaqları Batumi bulvarında müxtəlif növ incəsənət, mədəniyyət, idman və turizm imkanlarını artıran investisiya layihələri ilə tanış olublar.  Gürcüstanın populyar müğənnilərinin iştirakı ilə təşkil edilən konsert proqramı atəşfəşanlıqla başa çatıb.

Qeyd edək ki, 28 Aprel 2019-cu il tarixdə baş tutan rəsmi açılış mərasimində Acariya Muxtar Respublikasının sədri cənab Tornike Rişvadze, Batumi şəhərinin meri cənab Laşa Komaxidze, Avropa İdman Şəhərləri və Paytaxtları Federasiyasının prezidenti cənab Cian Françesko Lupatelli və 14 şəhərin mer və vitse merləri, şəhərləri təmsil edən ölkələrin səfirləri və baş konsulları iştirak edib. Batumilə qardaşlaşmış şəhərləri təmsil edən qonaqlar sırasına Naxçıvan Muxtar Respublikasının Naxçıvan şəhərinin meri, Misirin Şarm el-şeyx vilayətinin qubernatoru, Türkiyənin Quşadası şəhərinin meri, İsrailin Netanya şəhərinin vitse meri və digərləri  daxil olub.