Ölkəmizdə ilk dəfə magistrlərin beynəlxalq elmi konfransı keçiriləcək

Azərbaycan Dövlət İqtisad Universitetində (UNEC) ölkəmizdə ilk dəfə magistrlərin beynəlxalq elmi konfransı keçiriləcək.

UNEC-dən AZƏRTAC-a bildirilib ki, mayın 31-dən iyunun 2-dək Bakıda keçiriləcək “İqtisadiyyat və idarəetmə ixtisaslarinda təhsil alan magistrantların” beynəlxalq elmi konfransında Almaniya, Böyük Britaniya, İtaliya, Polşa, Macarıstan və digər ölkələrin ali təhsil müəssisələrinin magistr pilləsində təhsil alan tələbələri iştirak edəcəklər. UNEC-in Beynəlxalq Magistratura və Doktorantura Mərkəzinin təşkilatçılığı, ICLEL beynəlxalq konfransının dəstəyi ilə reallaşacaq tədbirin məqsədi ölkəmizdə elmin inkişafına, xüsusilə də elmi tədqiqatların ön plana çıxdığı magistratura pilləsində təhsil alan gənclərin öz tədqiqatlarını təqdim etməsi üçün beynəlxalq platformanın yaradılmasıdır.

Konfransda iqtisadiyyat və idarəetmə ixtisaslarında həm yerli, həm də xarici ölkələrdə təhsil alan gənclər magistr tədqiqatlarının nəticələrini bölüşəcək, tədqiqatların keyfiyyətinin artırılması üçün fikir mübadiləsi aparacaqlar. Konfransa Azərbaycan, ingilis, türk və rus dillərində qəbul olunan məqalələr ICLEL–in rəsmi internet səhifəsində beynəlxalq ISSN nömrəli formatda elektron qaydada yerləşdiriləcək. Bu isə dünyanın müxtəlif ölkələrindən olan tədqiqatçı gənclərin konfransın nəticələrindən faydalana bilmələrini təmin edəcək.

UNEC-in Beynəlxalq Magistratura və Doktorantura Mərkəzi bu konfransın ənənəvi olaraq hər il keçirilməsini planlaşdırır.

Ətraflı məlumat news.unec.edu.az saytında yerləşdirilib.