Polad Həşimovun adını daşıyacaq dron üçün kampaniyaya start verilir

“Türkiyə və İsrail istehsalı pilotsuz uçuş aparatlarına (PUA) - Bayraktar və Harop-a sahib olmaqla yanaşı, öz “Polad Həşimov”umuzu da inkişaf etdirməyə məcburuq. Şəhid generalımız Polad Həşimovun adı verilən pilotsuz uçuş aparatı 1235 mm uzunluğa sahib olacaq. Hazırlanmasında məqsəd dövlət sərhədlərimizin düşmənin hücumundan müdafiəsinin təmin edilməsi və müxtəlif təxribatlara cəhd edən diversiya qruplarını aşkar edərək məhv etməkdir”.

Ens.az TED.az-a istinadən xəbər verir ki, bunu “Polad Həşimov” pilotsuz uçuş aparatının ideya müəllifi Tural İsmayılzadə deyib.

T.İsmayılzadə qeyd edib ki, dron xüsusi relslərin üzərindən havaya qalxacaq: "Aparat sərhəd boyunca havadan müşahidə aparacaq, düşmən tərəfindən sərhəddimizə yaxınlaşma təyin etdiyi halda ordumuza siqnal ötürərək düşmən dəstələrini məhv edəcək. Kiçik ölçülərinə, yüksək manevr imkanlarına və yerə ən yaxın məsafədə (max 3 m) uça bilmə qabiliyyətinə görə, asanlıqla radarlardan və məhv etmə qurğularından yayına biləcək”.

Startapçının sözlərinə görə, layihənin reallaşması üçün dəstəyə ehtiyacı var. Buna görə də vəsait toplantısının şəffaflığını təmin etməsi məqsədilə layihənin İctimai Nəzarət Şurası yaradılıb: “Şura üzvləri layihənin ümumi icrası ilə tanış ola, xərclər smetasını gözdən keçirə və yaranacaq problemlərlə bağlı fikrini bildirə biləcək, ictimaiyyəti mütəmadi məlumatlandıracaqlar. İctimai Nəzarət Şurasına hələlik 12 namizədi təqdim edirəm. Onlarla yola başlayıb, daha sonra ictimai nəzarətçilərin sayını artıracağıq. Bir çoxları üçün bu sürpriz təklif olacaq, ancaq onların dəstəyinə arxalandığım üçün bunu xəbərdar etmədən, birbaşa açıqladım:

1. Hikmət Əliyev;

2. Kamil Musəvi;

3. Ceyhun Osmanlı;

4. Əzizə İsmayılova;

5. Əlyar İslamoğlu;

6. Mübariz Göyüşlü;

7. Gülşən Məmmədoğlu;

8. Əminağa Hacıyev;

9. Samir Həsənov;

10. Yaşar Əhmədli;

11. Vəfadar Babayev;

12. Mehriban Mehrab”.

Layihə müəllifi qeyd edib ki, sabahdan layihəyə dəstək kampaniyasına başlanacaq: “Tezliklə layihəni tamamlayıb, uçuş aparatını uçuşa və sınağa tam hazır vəziyyətdə ordumuza təhvil verəcəyik”.