Polad Həşimovun xatirəsinə Gəncədə mini-futbol çempionatı keçirildi

05 sentyabr 2020-ci il tarixdə Gəncə Şəhər Gənclər və İdman Baş İdarəsinin təşkilatçılığı ilə “Şəhid General-mayor Polad Həşimov”un xatirəsinə həsr olunmuş həvəskarlar arasında keçirilən mini-futbol üzrə Gəncə şəhər çempionatının final mərhələsi baş tutub.

Finalda 1-ci və 2-ci yerlər üçün "Acces Bank" QSC-nin Gəncə filialının və Turan Bank" ASC-nin Gəncə filialının komandaları, 3-cü və 4-cü yerlər üçün isə "Bank Respublika" ASC-nin Gəncə filialının və "Rabitə Bank" ASC-nin Gəncə filialının komandaları mübarizə aparıblar.

I yeri "Acces Bank" QSC-nin Gəncə filialının komandası, II yeri "Turan Bank" ASC-nin Gəncə filialının komandası, III yeri isə "Bank Respublika" ASC-nin Gəncə filialının komandası tutub. Sonda qalib komandalar Gəncə Şəhər Gənclər və İdman Baş İdarəsinin rəisi Həmid Nəsirov tərəfindən kubok, diplom və hədiyələrlə mükafatlandırılıb.

Qeyd edək ki, Azərbaycan Respublikasının Nazirlər Kabineti yanında Operativ Qərargahın qərarına əsasən açıq havada idman yarışları və oyunlarının keçirilməsinə icazə verilməsini nəzərə alaraq, idman yarışı təlimatlara uyğun tamaşaçısız, sanitar və gigiyenik şərtlərə riayət edilməklə keçirilib.

Mənbə: Baki-xeber.com