Prezident: "Azərbaycan və Ermənistanın maraqları üst-üstə düşə bilər"

"Mən istisna etmirəm ki, Azərbaycan və Ermənistanın maraqları üst-üstə düşə bilər".

Ens.Az xəbər verir ki, bunu Azərbaycan Prezidenti İlham Əliyev III Şuşa Qlobal Media Forumunun iştirakçıları ilə görüşdə bəyan edib.

"İş burasındadır ki, Ermənistan məsələni fərqli görür. İşğal, zorakılıq və soyqırım olmasaydı, Cənubi Qafqazda vəziyyət başqa cür olardı. Bölgə siyasi, iqtisadi, nəqliyyat və enerji baxımından çoxdan inteqrasiya edilmiş bir məkan olardı. Bu qədər zaman itkisi olmazdı. Bunun səbəbi bizdə deyil, Ermənistanda hakimiyyətdə olan rejimlərin işğalçı mahiyyətində idi. Azərbaycan fobiyası və əsassız təcavüzkarlıq. Kim təminat verir ki, bu yanaşma, bu şüur yenidən hakim olmayacaq?", - dövlət başçısı qeyd edib.

Prezident vurğulayıb ki, separatçılığın kökünün kəsilməsinə dair belə zəmanəti yalnız beynəlxalq sənədlər, dəmir kimi möhkəm normalar təmin edə bilər.

"Bunun üçün Minsk Qrupu buraxılmalı, Ermənistan Konstitusiyası dəyişilməlidir, orada yer alan Azərbaycana qarşı ərazi iddiaları aradan qaldırılmalıdır", - deyə prezident qeyd edib.