Purism Librem 5: təhlükəsiz Linux smartfonun istehsalı üçün 1,5 milyon dollar lazımdır

Tam açıq mənbəli proqram platforması üzərində noutbuk və planşet istehsalıçısı olan Purism şirkəti növbəti layihəsini təqdim etdi: təhlükəsiz smartfon Librem 5.

Smartfonun istehsalının təşkili üçün maliyyə vəsaiti kraudfandinq proqramı ilə cəlb olunması planlaşdırılır. Tələb olunan məbləğ isə 1,5 milyon ABŞ dollarıdır. Bu vəsait nə üçün xərclənəcək?

Purism maksimum konfidensiallıq və təhlükəsizliyi təmin edən smartfon hazırlamağa vəd verir. Geniş yayılmış Android platforması əvəzində xüsusi komponentlərdən azad olunan Linux nüvəsi üzərində PureOS ƏS-nin istifadəsi nəzərdə tutulur. Bundan əlavə deyilir ki, nəzəri cəhətdən istifadəçilər istənilən GNU/Linux distributivini istifadə edə bilərlər.

Təhlükəsizliyi təmin etmək üçün mərkəzi prosessor mobil rabitənin dəstəyini təmin edən çipdən ayrılacaq. Lazım olduqda kamera, mikrofon, WiFi/Bluetooth adapterlərini tamamilə söndürməyə imkan verən xüsusi cərəyan kəsicilərdən istifadə olunacaq. Əlavə müdafiəni isə şifrələmə vasitələri təmin edəcək.

Aparatın əsası 3Qb LPDDR3 əməli yaadaşla tandemdə işləyən i.MX6/i.MX8 prosessoru olacaq. 32Qb dəstəkləyən eMMC fleş modulu əlavə MicroSD kartın istifadəsinə imkan yaradacaq. Sensor displeyin ölçüsü 5 dyüm olacaq.

Wi-Fi və Bluetooth 4.0 simsiz rabitə kontrollerləri, GPS qəbuledicisi, simmetrik USB Type-C portuna malik olacaq. Ötürücülər dəstinə akselerometr, hiroskop, elektron kompas, yaxınlaşma və işıqlandırma sensorları daxildir.

Qeyd olunur ki, smartfon klaviatura, maus və monitor qoşduqda kiçik gücə malik kompüterə alternativ ola bilər.

Vəsait toplanması üçün iki ay vaxt təyin olunub. Librem 5 smartfonunun dəyəri 600 ABŞ dollarıdır. Kraudfandinq kampaniyası uğurlu olduğu təqdirdə çatdırılma 2019-cu ilin yanvarından başlanacaq.

Müəllif: Famil Ələkbərov