Qəbul imtahanlarında yüksək nəticə göstərən ağcabədili məzunlar mükafatlandırılıblar

Bu il Ağcabədi rayonunun ümumtəhsil məktəblərini bitirən məzunlardan 625-i ali məktəblərə keçirilən qəbul imtahanlarında iştirak etmək üçün sənəd verib və onlardan 422-si tələbə adını qazanıb. Gənclərdən 52-si 500-600 arası, 25-i isə 600-dən çox bal toplayıb.

AZƏRTAC-ın bölgə müxbiri xəbər verir ki, Ağcabədi rayon Mədəniyyət Mərkəzində bu il respublikanın ali məktəblərinə qəbul olunan gənclərlə görüş keçirilib. Tədbir iştirakçıları əvvəlcə ulu öndər Heydər Əliyevin şəhərin mərkəzi meydanındakı abidəsi önünə tər çiçəklər düzərək xatirəsini ehtiramla yad edib, Heydər Əliyev Mərkəzində xatirə şəkli çəkdiriblər.

Tədbirdə çıxış edənlər tələbə adını qazanan gəncləri təbrik edərək uğurlar diləyib, onlara savadlı və bilikli mütəxəssis kimi yetişmək üçün yaxşı oxumağı və Vətənə ləyaqətlə xidmət göstərməyi tövsiyə ediblər.

Tələbə adını qazanan gənclər göstərilən diqqət və qayğıya görə minnətdarlıqlarını bildirib, müəllim və valideynlərinin etimadını doğruldacaqlarına, bilik və elmlərə əzmlə yiyələnib ölkəmiz üçün savadlı mütəxəssis kimi yetişəcəklərinə söz veriblər.

Ali təhsil müəssisələrinə qəbul imtahanlarında 600-dən yuxarı bal toplayan tələblərə Ağcabədi Rayon İcra Hakimiyyətinin fəxri fərmanı və hədiyyələr verilib.