Ronaldo "Yuventus"a görə Portuqaliya millisinin oyunlarını buraxacaq

Ronaldo "Yuventus"a görə Portuqaliya millisinin oyunlarını buraxacaq

 İtaliya "Yuventus"unun futbolçusu Kriştiano Ronaldo Portuqaliya millisinin qarşıdakı oyunlarını buraxmağı qərara alıb. 

"Report" "Sky Sports"a istinadən xəbər verir ki, 33 yaşlı hücumçu bu addımı bütün diqqətini klubundakı çıxışına yönəltmək üçün atıb. 

Portuqaliya yığması sentyabrın 6-da Xorvatiya ilə yoldaşlıq görüşündə, sentyabrın 10-da isə İtaliya ilə Millətlər Liqası matçında üz-üzə gələcək. Ronaldo milli komandaların oyunları ilə əlaqədar yaranan fasilə müddətindən faydalanmaq niyyətindədir. Təcrübəli oyunçu klubuna tam uyğunlaşmağı və onun bir hissəsinə çevrilməyi hədəfləyib. 

Qeyd edək ki, Kriştiano Ronaldo "Yuventus"un heyətində A Seriyasında 2 oyuna çıxsa da, qol vura bilməyib.