Şair Məmmədhüseyn - Haçan gəlirsən

Başına döndüyüm gül üzlü oğul,
Oğul, söylə görüm, haçan gəlirsən?
Gecə-gündüz həsrətini çəkirəm,
Oğul, söylə görüm, haçan gəlirsən?

Sana gəlməz günüm, gedir ömürdən,
Namərd didar edib məni elimdən.
Bu sinnidə ayrılmışam gülümdən,
Oğul, söylə görüm, haçan gəlirsən?

Susanmıram, var-dövlətim alıblar,
Şahmar kimi ürəyimdən çalıblar.
Məmmədhüseyni yaman oda salıblar,
Oğul, söylə görüm, haçan gəlirsən?