Şair Məmmədhüseyn - Oddadı
Bənd oldum bir sərviboyun hüsnünə,
Qatıb atəşinə məni oddadı.
Dedim: – Gün düşməsin mələk hüsnünə,
Dedi: – Gör necədi hələ, od dadı.
Dedim: – Çox incitmə eşqə yananı,
Rəhmin gəlsin barı yanhayan anı.
Könül ver, eşqimin olma yamanı,
Dedi: – Görəmməzsən məndə o dadı.
Dedim: – Məmmədhüseyni gəl salma dara,
Qorxudammaz məni hər çətin, dar a!
Dönmərəm dilimdən çəkdirsən dara,
Dedi: – Səməndərin meyli oddadı.
Məqaləni bəyəndiniz? Sosial şəbəkələrdə izləyin!
Şərhlər
Şərhləri göstər Şərhləri gizlət