“Seçkilərin şəffaf keçirilməsi üçün lazımi tədbirlər görülür” – Məzahir Pənahov

“Ən yeni tariximizin müstəsna əhəmiyyətli ictimai-siyasi hadisəsi olan bu irimiqyaslı tədbirin Azərbaycan Respublikasının Konstitusiyası və Seçki Məcəlləsinin tələblərinə uyğun, azad, ədalətli və şəffaf keçirilməsi üçün Mərkəzi Seçki Komissiyası tərəfindən hazırlanıb təsdiq edilmiş Təqvim planı əsasında lazımi tədbirlər görülür, bütün addımlar ardıcıl, sistemli və keyfiyyətlə atılır”.

Ens.az Yeniavaz.com-a istinadən xəbər verir ki, bu, MSK sədrinin Ekspert qrupu üzvlərinə müraciətində əksini tapıb.

Bildirilib ki, geniş maarifləndirmə və məlumatlandırma proqramı üzrə nəzərdə tutulan layihələr seçicilər, aşağı seçki komissiyalarının üzvləri və müxtəlif statuslu digər seçki subyektləri kimi Ekspert qrupu üzvlərini də əhatə etməklə müvəffəqiyyətlə gerçəkləşdirilir.

“Ekspert qrupu üzvləri vətəndaşların seçki hüquqlarının daha səmərəli təmin edilməsində böyük məsuliyyət daşıyırlar. Ona görə də Siz öz vəzifə və səlahiyyətlərinizin öhdəsindən yüksək peşəkarlıqla gələrək seçki hüquqlarının qorunması, vətəndaşların seçki hüququnu pozan hərəkətlərdən (hərəkətsizlikdən) və qərarlardan şikayət və müraciətlərin araşdırılması kimi mühüm məsələni Seçki Məcəlləsinin tələblərinə uyğun, dəqiqliklə yerinə yetirməlisiniz”, - müraciətdə deyilir.