Seyid Əzim Şirvani - Məktəbli ilə müəllimin əhvalatı

Bir uşaq incimişdi məktəbdən, 
Dedi: - Ey xaliqi-zəminü zəmən, 
Bir ölüm ver bizim bu ustadə, 
Ta olum məktəbindən azadə. 
Bir doyunca gedim gəzim baği, 
Həm edim baği seyr, həm daği. 
Bu duani eşitdi mollası, 
Dedi: - Oğlum, bunun nə mənası? 
Mən əgər rehlət etsəm üqbayə,
Qoyar atan bir özgə mollayə. 
Atanın mərgini istə, ey nadan, 
Qalasan ta yetimü sərgərdan.