Soydaşımız Rusiyada baş direktor oldu

Rusiyada yaşayan soydaşımız Elvin Məmmədov, bu ölkənin irimiqyaslı istehsalat müəssisələrindən olan Lipetsk Sement Zavodunun baş direktoru təyin edilib. Beş növ sement istehsal edən "LipetskSement" "AvroSementQrup" Holdinqə daxil olub, Lipetsk bölgəsində Avropa standartında ən böyük sement istehsalçısıdır. Sement sənayesi müəssisələri arasında "LipetskSement" bir çox cəhətdən qabaqcıldır - burada müxtəlif yeni texnologiyaların tətbiq edildiyi xətlər, sahələr fasiləsiz şəkildə, yüksək keyfiyyətli məhsul istehsalını təmin edir. Bu gün şirkət yalnı aid olduğu holdinq daxilində deyil, əhatə etdiyi böyük regionda və ümumən dünya sement istehsalçıları arasında qabaqcıl istehsal və ida­rəetmə həllərini tətbiq etməsi ilə fərqlənir.

XX yüzilin 60-cı illərindən bəri Lipetsk və çevrəsindəki, demək olar, bütün böyük sənaye və yaşayış obyektləri, Lipetsk Dövlət Akademik Dram Teatrı, idman sarayları, böyük alış-veriş mərkəzləri, məktəb və uşaq bağçaları, istehsalat kompleksləri, sağlamlıq ocaqları, "kottec qəsəbə"lər, otellər, Lipetsk Hava Limanının uçuş-enmə zolağı, o cümlədən dəmir yolu vağzalı, avtovağzal, bir çox b. müəssisələr, iri obyektlər, önəmli ünvanlar soydaşımızın baş direktoru olduğu zavodun məhsulları ilə araya-ərsəyə gəlib yaxud yenidən qurulub.

Elvin Məmədov öz intellekt, bacarıq və idarəetmə yetənəyinə, eləcə də, "LipetskSement"in tarixçəsinə, potensialına güvənərək, "daha güclü, daha böyük, daha çoxçeşidli!" devizi (və haqlı iddiası) ilə çıxış edərək, "Mən bizim məhsulların yüksək keyfiyyətinə şəxsən təminat verirəm" deyir.

Soydaşımızın belə bir məsuliyyətli işə rəhbərlik etməsi qürurumuzdur. Təbrik edirik! Uğurlar!

p.s. Onu da əlavə edək ki, Elvin Məmmədov Rusiya Federasiyasında yaşayıb-yaradan məşhur azərbaycanlılardan Əliş Zabid oğlu Məmmədovun oğludur. 1958-ci ildə Şəkinin Orabon kəndində doğulmuş Əliş Z.Məmmədov Saxa Respublikası Dövlət Məclisinin üzvü, Saxanın Fəxri Vətəndaşı və Əməkdar İnşaatçıdır. O, hazırda Saxa Azərbaycanlıları Cəmiyyətinin - Saxadakı diaspora təşkilatımızın da başçısıdır.

Mənbə: Olaylar.Az