6 iyun 2020, şənbə
.
.
chevron_left chevron_right
AZƏRBAYCANLI

Tanrının pıçıltısını SÖZə çevirən insan

Tanrının pıçıltısını SÖZə çevirən insan

121 Baxış
Tanrının pıçıltısını SÖZə çevirən insan

Texniki tərəfləri öz yerində, şeir əgər ruha sığal çəkə bilmirsə sadəcə söz yığınıdır. Poeziya o zaman qüdrətli olur ki, insanı sehrləyə bilir. Və bu sehr müvəqqəti də olsa oxucunu saflaşdırır, aydın düşünməyə vadar edir. Elçin Mirzəbəyli siyasətçi kimi sıradan biri, jurnalist kimi peşəkar ola bilər, amma bir şair kimi bu gün ölkədə ən mükəmməl poeziya nümunələri yarada bilən beş-on insandan biridir.

 

Gözlərini açıb görəsən

Goy üzü yaxından yaxındı sənə.

Bir ilıq meh əsib

Son nəfəs kimi

Son dəfə...

Son dəfə toxundu sənə.

 

Bir gün

əllərini açıb görəsən...

dualar ovcunda işığa dönüb.

Bütün arzuların körpədi hələ,

Bütün ümidlərin uşağa dönüb.

 

…Bir gün yaşayasan…

Elə bir gün ki,

Üstünə 100 ilin savabı gələ.

Sonra da…

ölümə məktub yazasan

“Səni gözləyirəm” cavabı gələ.

 

“Bir gün” adlandırdığı bu şeir bir romana bərabər əsər deyilmi? Onun “Elə darıxasan” şeirini həyacansız oxumaq mümkündürmü?

 

Elə darıxasan

Sözün dilindən

Asıla...

Dilinin ucu göynəyə.

Gözünə çəkəsən bütün yolları,

Çəkəsən...

Gözünün içi göynəyə.

 

Elə darıxasan...

Bir udum suya

Təşnətək

bir sözə təşnə olasan.

Yollar ayrıcında daşa dönəsən -

Heç kimin olmayan

Heç nə olasan.

Dönüb künc olasan, bucaq olasan

İllərlə üstünə ayaq dəyməyə.

Min yerdən çat verən dodaq olasan -

Bir əl toxunmaya, dodaq dəyməyə.

 

Elə darıxasan...

Nəfəsin çıxa

Yarı tüstü kimi, yarı od kimi.

Şərqi oxuyasan Ay işığına

Yarı adam kimi, yarı qurd kimi.

 

Elə darıxasan...

Tanrı özü də

Baxıb təkliyindən üşüyə sənin.

Tutub əllərindən çəkib apara,

Apara bir isti köşəyə səni…

 

Görün, necə ustalıqla qəzəbini ifadə edə bilib. Sanki bu sözlər nifrətdən deyil, sevgidən qaynaqlanır, daha çox duaya bənzəyir…

Elçin Mirzəbəylinin şeirləri rəngarəngdir- Ağı, qarası, yaşılı, göyü, qəhvəyisi, qırmızısı, sarısı var. Məsələn, bu şeir qəhvəyi rəngdədir:

 

Başını yastıqda bilərsən, kimsə

Altına bir edam kötüyü çəkər...

Ümidin sonuncu mərmiyə qalar –

Sonuncu ümidin tətiyi çəkər.

 

Ağrıdan çat verər yenə ürəyin -

Yenər ağrıları,

Yenər ürəyin,

Barıt çəlləyinə dönər ürəyin

İçində sevdalar fitili çəkər...

 

Sıyrılıb ömrünün son baharından,

Bir gün xəzan vurmuş arzularından

Özünü asarsan,

Arzuların da

Ayağın altından kətili çəkər...

 

Sınar əzabların – sınar dözümün,

Yuyar göz yaşları, yuyar üzünü...

Sevdiyin qadın da yumar gözünü -

Üstünə sevdiyin örtüyü çəkər...

 

Bu isə qırmızı:

 

Hanı sevgi qoxuyan,

Hanı çiçək adamlar?

Yarınağıl adamlar,

Yarıgerçək adamlar.

 

Göylərəmi çəkildi?

Buludamı büküldü?

Xəzan vurdu...

Töküldü.

Ləçək-ləçək adamlar.

 

Yol göründü...

Yol-ümüd.

Kimə məzar, kimə yurd...

Yedi bizi yarıqurd.

Yarıböcək adamlar...

 

Bu şeirin ağ rəngdə olduğu saflığında, duruluğundadır:

 

Ya Rəbb, deyəcəyim söz də qalmadı,

Nə mən danışanam,

Nə sən duyansan.

“Ömürdü, həyatdı…”, - dedim,

Olmadı -

Hər nədir, adını özün qoyarsan.

 

Neyləyim, verdiyin su ömrü deyil

Yağışda danışım, seldə danışım.

Ya mənim dilimdə yaz taleyimi,

Ya da...

Sən bildiyin dildə danışım...

 

Göy üzü yorulub dualarımdan -

Bəlkə süzgəcindən keçmir, İlahi?

Mən hər gün ömrümün son baharından

Köçürəm,

Vücudum köçmür, İlahi.

 

Nə hesab soranam, nə hesab yazan -

Varlığım kimsəyə qənim ki, deyil.

Daha yol qalmayıb

Yolundan aza -

Bu sənin dünyandı, mənimki deyil.

 

Bəli, Elçin Mirzəbəyli yaradıcılığı özündə müxtəlif rəngləri ehtiva edən şeirlərdən ibarətdir. Onları həyacansız oxumaq olmur. Əslində, bu şeirlərin təhlilə ehtiyacı yoxdur. Hər biri gözəl poeziya nümunəsi, Tanrının SÖZlərə çevrilən pıçıltılarıdır...

 

 


Müəllif: Elman Eldaroğlu





Diqqət! Ens.az saytına məxsus materiallardan istifadə edərkən hiperlinklə istinad edilməlidir. Mətndə səhv tapdıqda, onu seçib ctrl + enter düyməsini basaraq bizə göndərməyinizi xahiş edirik.


Android ƏS olan smartfonunuz varsa, xəbərləri daha rahat oxumaq üçün bu linkə keçərək Play Store mağazasından Ens.az proqramını endirib quraşdıra bilərsiniz.


VİDEO QALEREYA
Qaçaq Nəbinin çəkilmiş yeganə şəkli, 1895-ci il.
Emosiya ilə reaksiya ver!
  • 0
  • 0
  • 0
  • 0
  • 0
  • 0 Şərh
  • anonymous user
    Şərhi göndər
  • DAHA ÇOX NƏTİCƏ YÜKLƏ
Oxşar xəbərlər

X