Tovuzdakı təxribat xəbərlərinə cavab- Yeni Müsavat əməkdaşları rayonun mərkəzindən yazır

"Yeni Müsavat" qəzetinin Tovuza ezam olunmuş reportyor qrupu rayonda bu saatlara olan vəziyyətlə bağlı məlumat verir.

Əməkdaşlarımız bildirir ki, hazırda rayon ərazisində sakitlikdir.

14 iyul saat 22:00 radələrindən rayon mərkəzində olan əməkdaşlarımız bildirir ki, sosial şəbəkələrdə Tovuzla bağlı yayılan məlumatlar həqiqəti əks etdirmir.

Sosial şəbəkələrdə Tovuz rayonunun mərkəzinin ermənilər tərəfindən atəşə tutulması, xeyli sayda itkimizin olması barədə əsassız məlumatlar yayılır.

"Bu dəqiqə də rayon mərkəzindəyik. Gecə gec saatlar olsa da küçələrdə insanlar var. Onlar da cəbhədə baş verən hadisələrin həyəcanını yaşayırlar. Hər kəs maraq və həyəcanla prosesləri izləyir, xoş xəbərlər gözləyir. Rayonun mərkəzinin atəşə tutulması xəbərləri əsassızdır. Çünki belə bir hadisənin baş verəcəyi halda gizlədilməsi mümkün deyil. Təsəvvür edin ki, hər dəqiqə qaynayan, əsgəri, hərbçisi, yerli sakinləri, media nümayəndələri küçələrdə olan bir rayonun mərkəzi necə ola bilər ki, ağır artilleriyadan atəşə tutulsun və kiminsə bundan xəbəri olmasın? Bu, dezinformasiyadır və əsassızdır",- deyə əməkdaşımız İlkin Muradov bildirir.

Səhər saatlarında əməkdaşımız Məhəmməd Türkmənin Tovuz rayonunun mərkəzindən hazırlayacağı video və fotoreportajları təqdim edəcəyik.

Əməkdaşlarımız həmçinin bildirib ki, Tovuzda hərbi hissənin vurulması xəbərləri də yanlışdır.

Musavat.com