Üzeyir Hacıbəyli X Beynəlxalq Musiqi Festivalının bağlanış konserti Heydər Əliyev Mərkəzində keçiriləcək

Üzeyir Hacıbəyli X Beynəlxalq Musiqi Festivalının bağlanış konserti sentyabrın 26-da Heydər Əliyev Mərkəzində keçiriləcək.

AZƏRTAC xəbər verir ki, konsertdə Əməkdar artist, dirijor Əyyub Quliyevin rəhbərliyi ilə Üzeyir Hacıbəyli adına Azərbaycan Dövlət Simfonik Orkestri, Rusiyanın Xalq artisti, məşhur violonçel ifaçısı Sergey Roldugin və P.İ.Çaykovski adına beynəlxalq müsabiqənin laureatı, skripkaçı Pavel Milyukov çıxış edəcəklər.

Qeyd edək ki, tanınmış violonçelist Sergey Roldugin 1951-ci ildə Rusiyada anadan olub. İlk musiqi təhsilini Riqa şəhərində alıb. 1975-ci ildə Leninqrad Konservatoriyasını fərqlənmə diplomu ilə bitirib. S.Roldugin Rusiyanın Əməkdar kollektivi Sankt-Peterburq Filarmoniyasının Akademik Simfonik Orkestrinin (1974-1984) və Mariinski Teatrının (1984-2003) solisti kimi fəaliyyət göstərib. 2003-2004-cü illərdə Rimski Korsakov adına Sankt-Peterburq Dövlət Konservatoriyasının rektoru vəzifəsində çalışıb. 2006-cı ildən öz təşəbbüsü ilə yaradılan Sankt-Peterburq Musiqi Evinin prezidentidir.

İstedadlı violin ifaçısı Pavel Milyukov 1984-cü ildə Rusiyada anadan olub. İlk musiqi təhsilini Moskva Dövlət Konservatoriyası nəzdində Akademik Musiqi Kollecində alıb. 2012-ci ildə Moskva Dövlət Konservatoriyasını aspirantura pilləsi üzrə bitirib. Hazırda Vyana Konservatoriyasının tələbəsidir. Rusiya, Almaniya, Avstriya, Çin, Yunanıstan, Macarıstan, Fransa və digər ölkələrdə keçirilən beynəlxalq müsabiqələrdə birinci yerlərə layiq görülüb.