Yardımlının vətənpərvər gəncləri

Ötən günlərdə 18 OKTYABR – DÖVLƏT MÜSTƏQİLLİK GÜNÜ münasibətiylə Yardımlı rayon Cerinbel kənd tam orta məktəbinin 10-11-ci sinif şagirdləri birlikdə bir komanda şəklində işləyərək həmin məktəbin informatika müəllimi Elşən İsmayılın və direktor Daşqın İmanzadənin də dəstəyilə məktəbdə keçirilən bayram tədbiri zamanı “MÜSTƏQİLLİYİMİZ ƏBƏDİDİR – BAYRAQ MÜQƏDDƏSDİR! (Bütöv Azərbaycan)” adlı bir tamaşa-səhnəcik qurmuşlar. Aldığımız məlumata əsasən, öyrəndik ki, tamaşanın ssenari müəllifi və rejissoru elə həmin məktəbin informatika müəllimi Elşən İsmayıldır. Onunla söhbətimiz zamanı müəllim “Onlar bu işi çox böyük həvəslə görürlər!” deyərək qeyd etdi ki, şagirdlərdən çox razıdır, istər dərslərində, istərsə də ictimai tədbirlərdə göstərdikləri fəallıq onların xüsusi qabiliyyət sahibləri olduqlarını göstərir.

    Müəllimin məktəb və gənc vətənpərvərlərlə bağlı bir neçə planı da var, belə ki, Elşən İsmayıl söhbət zamanı bizə bir sirr də verdi ki, bu il ərzində həmin şagirdlərlə birlikdə bir neçə milli mövzulu tamaşa və film hazırlığındadır. Hətta, süjeti 1988-1990-cı illər Milli Xalq Hərəkatımızdan bəhs edəcək olan filmdə müəllim özü də rol almaqla gənclərə dəstək olmağa çalışacaqdır! Film vətənimizin milli birliyi, dövlətçilik ənənəmizin təbliğatı və gənclərdə vətənpərvərlik ruhunun oyanışı məqsədiylə hazırlanır.

    Məktəbin direktoru Daşqın İmanzadə də bildirdi ki, yeni əmək fəaliyyətinə başlamasına baxmayaraq Elşən müəllim çox istedadlıdır və bütün müəllimlər, şagirdlərin qısa zamanda sevgisini, hörmətini və yüksək etimadını qazana bilib. Belə bir istedadlı, bir çox sahədə qabiliyyətli olan gənc müəllimlərin varlığı xalqımızın gələcəyi, təhsil sahəmizin inkişafı və dövlətimizin güclənməsi üçün çox vacibdir!

    Direktor onu da qeyd etdi ki, təhsil sahəsindəki yeniliklər və yeni Kurikulum sisteminin tətbiqi, hörmətli Nazirimiz və Ölkə Başçımızın təhsilə, gənclərə verdikləri qayğı nəticəsində yüksək inkişaf yolunu tutaraq yaxın gələcəkdə gənclərimizin daha da böyük nailiyyətlər əldə etməsinə səbəb olacaqdır...

Elşən İsmayıl