Türkiyədə 75 yaşlı müəllim ikinci dəfə mühəndis oldu

Ens.az Haberler.com-a istinadən məlumat verir ki, təhsilə üstünlük verən Nəzmi Çinar (75) 1967-ci ildə institutu bitirərək müəllim oldu. 8 il müəllimlik etdikdən sonra 1974-cü ildə İstanbul Texniki Universitetinin İnşaat fakültəsinə daxil oldu. 6 ildən sonra universiteti bitirən Çinar inşaat mühəndisi olaraq məzun oldu. Məzun olduqdan sonra inşaat mühəndisi olaraq Orta Şərq və Afrikadakı ölkələrdə 15 il işlədi. Çinar: “Daha sonra ölkəmə qayıdaraq burada mühəndis olaraq işlədim. 2001-ci ildə Amerikaya gedib 1 il işlədikdən sonra təkrar ölkəmə qayıdıb təqaüdçü oldum. Təbiətə və ətraf mühitə bağlı bir insanam. Torpaqla vaxt keçirməyi xoşlayıram. Bu sevgim məni Uludağ Universitetinin Kənd Təsərrüfatı fakültəsinə daxil olmağa təşviq etdi. Uludağ Universiteti Kənd Təsərrüfatı fakültəsinin Bağça Bitkiləri ixtisasını 2 ildə bitirdim. Daha sonra 6 ay İtaliyada təhsil alaraq məzun oldum. İkinci mühəndislik diplomumu aldım. Ətrafımdakı insanlar oxuma həvəsimi görəndə təəccüblənir. Mən gənclərə nümunə olmaq istədim. İnsan əziyyət çəkib işləyirsə hər şeyin öhdəsindən gələ bilər” – dedi.

Tərcümə: Famil Ələkbərov