Ana bətninə maye yeridilməsi böyrək çatışmazlığı olan dölün doğuşdan sonra sağ qalmasına kömək edir

Ana bətninə maye yeridilməsi böyrək çatışmazlığı olan dölün doğuşdan sonra sağ qalmasına kömək edir

Cons Hopkins Universitetinin alimlərinin apardığı klinik tədqiqat göstərib ki, ana bətninə amniotik mayeni əvəz edən məhlulların yeridilməsi və doğuşdan sonra dializ tətbiqi dölün böyrək çatışmazlığı ilə müşayiət olunan anhidramnioz zamanı sağ qalma şansını əhəmiyyətli dərəcədə artıra bilər. Araşdırmanın nəticələri JAMA jurnalında dərc olunub.

Normal şəraitdə hamiləliyin 16–20-ci həftələri arasında amniotik mayenin 90 faizdən çoxu dölün sidiyi hesabına formalaşır və ağciyərlərin inkişafı üçün vacib qida maddələri, hormonlar və digər amilləri təmin edir. Böyrəklərin, sidik axarlarının, sidik kisəsinin və ya sidik kanalının inkişaf qüsurları nəticəsində sidik əmələ gəlmədikdə və ya xaric ola bilmədikdə anhidramnioz yaranır.

ABŞ-ın 13 tibb mərkəzində, o cümlədən əlaqələndirici mərkəz kimi çıxış edən Cons Hopkins Tibb Sistemində həyata keçirilən RAFT (Renal Anhydramnios Fetal Therapy) tədqiqatı çərçivəsində hamilə qadınlara təkrarən amniotik mayeni təqlid edən məhlullar yeridilib. Məqsəd dölün ağciyərlərinin inkişafını stimullaşdırmaq və körpələrin fəaliyyət göstərən ağciyərlərlə doğulmasını təmin etmək olub.

Tədqiqatın son mərhələsində 32 hamilə qadın iştirak edib və onlara hamiləliyin 26-cı həftəsindən əvvəl başlayaraq ardıcıl amnioinfuzionlar tətbiq olunub. Hamiləliklərin 90 faizdən çoxu 37-ci həftədən əvvəl vaxtından əvvəl, lakin diri doğuşla nəticələnib. Körpələrin 65,5 faizi ən azı iki həftə yaşayıb və xroniki böyrək çatışmazlığının müalicəsində ilk addım olan cərrahi dializ girişinin qoyulmasına dözüb.

Alimlər hesab edirlər ki, amnioinfuzionlar bu xəstəliklə üzləşən hamilələr üçün təhlükəsiz və effektiv müalicə üsulu ola bilər. Növbəti mərhələdə əsas məqsəd müalicənin məlum ağırlaşmalarından biri olan vaxtından əvvəl doğuşların sayını azaltmaq və doğuşdan sonrakı tibbi yardımı daha da təkmilləşdirməkdir.

Mənbə:medicalxpress.com